Gaur eguerdian Arrankudiaga-Zolloko herrigunea hartu dute duela hamar urte egindako galdeketa gogora ekartzeko. 11:30ean sortzaileen azoka antolatu dute eta 12:30ean abiatu dute ekitaldia.
Lehenik eta behin tokiko herritarrek hartu dute hitza erabakitzeko eskubidea aldarrikatzeko eta egindako lana gogoratzeko. Gero bertso saioari ekin diote eta, besteak beste, Joseba Martin ekimenaren sustatzaileetako bat oroitu dute kantuz.
Jarraian, Josu Etxaburu Gure Esku Dago plataformaren bozeramaileak hitz egin du. Aldarrikatu eta goraipatu du Arrankudiaga-Zollok Etxarriren lekukoa hartu zuela herri galdeketa antolatzeko. Argitu du duela hamar urteko urratsa mugarri bat izan zela bide luze batean.
Horrela, Etxaburuk azpimarratu du egindako pauso hori gabe ezinezkoa litzatekela egun estatus politikoaren eztabaida existitzea.
Halaber, deia zabaldu du azaroaren 16an gauzatuko duten "giza kate digitalean" parte hartzeko. Izan ere, hamabi orduko zuzeneko emankizuna egingo dute, Euskal Herriko txoko anitzetatik bidalitako bideoekin, burujabetasuna eta erabakitzeko eskubidea aldarrikatzeko. Horrez gain, kultura ekintzak prestatuko dituzte hiriburuetan.
Amaitzeko, Gure Esku Dagoren kanta abestu dute guztien artean eta mokadua hartu dute. Gaurko ekitaldiaren antolatzaileek azpimarratu dute auzolanean prestatu dutela dena, duela hamar urte bezala.