Eraso matxista gertatu zen Arrankudiaga-Zollon asteazken gauerdian. Ertzaintzak adierazi duenez, esku-hartu behar izan zuen, eta gizon bat atxilotu eta epaitegira eraman zuten atzo, indarkeria matxista leporatuta.
Hori salatzeko, tokiko Emakumeen Sareak mobilizazioa deitu du gaur 19:30ean herriko plazan. Horrez gain, Udalean aritzen diren bi alderdiek, EH Bilduk zein EAJk, bat egin dute kontzentrazioarekin eta oharra plazaratu dute herritar guztien partaidetza sustatzeko
Ordezkari politikoak dituzten bi taldeek gertatutakoa gaitzetsi eta babes osoa helarazi diote emakume erasotuari. "Dauzkagun baliabide guztiak jarri ditugu haren eskura. Kasuaren gainean lanean jarraitzen dugu, laguntza emozionala eta gure eskura dauzkagun baliabideak bermatzeko", adierazi dute.
Hala adierazi dute Udaleko ordezkariek: "Jendarte parekidea eraikitzeko eta emakumeen eta gizonen arteko botere-harremanak gainditzeko beharra inoiz baino ageriago uzten du gertaera latz honek. Horretan ardura berezia dugu erakunde publikook. Indarkeria eta eraso matxistak ezin dira gertaera isolatu edo salbuespen gisa ulertu. Indarkeria matxista sistema patriarkalaren adierazpide bat da, adierazpiderik edo ondoriorik larriena, emakume eta gizonen arteko botere-harremanak mantentzeko baliabide indartsua baita. Indarkeria matxista lehen mailako arazoa da. Emakumeen eguneroko ogia".
Horren aurrean, gogoratu dute indarkeria matxista arazo kolektiboa dela, ezin dena esparru pribatuan geratu. Halaber, prebentzioa eta autodefentsa feministan jardutea beharrezkoa dela aldarrikatu dute.
Gogoratu beharra dago irailean beste eraso matxista bat jazo zela udalerrian eta herritarrek esku-hartu zutela.