Aiaraldeko Euskararen Eguna Arrankudiaga-Zollon ospatuko du aurten eskualdeko Euskalgintza Kontseiluak, azaroaren 29an eta abenduaren 1ean.
Gaur arratsaldean egin dute ekimena aurkezteko agerraldia. Bertan plazaratu dute Arrankudiaga-Zolloko herritar eta eragileekin batera hilabetetan zehar ondutako egitaraua, Euskararen Eguna eskualdeko osoko herritarrekin ospatzeko. "Publiko anitza asebeteko duen eskaintzan musika, mendia, jan-edana, adin guztietarako jolasak, umorea... ez dira ez faltako", nabarmendu dute. Eta horretarako konplizeak ez dira gutxi, Kontseiluaren hitzetan: Mantxinkorta mendi taldea, Kamaraka pilota elkartea, Arrankudiagako Eskola eta IGEa, Musika Eskola, Eskubaloi taldea, Kirikiño...
Jaiaren egitarauaren inguruko xehetasun guztiak Kontseiluaren webgunean aletuko dituzte datozen egunetan. Bestalde, Arrankudiagara trenez hurbiltzeko gomendioa egin dute, "erosotasuna, segurtasuna eta bideragarritasuna buruan".
Arrankudiaga-Zollon euskara borbor
Euskara bultzatzeko hainbat ekimenetan dago murgilduta Arrankudiaga-Zollo, Aiaraldeko eta Euskal Herriko Euskalgintza Kontseiluekin zein UEMArekin elkarlanean. Prozesu parte hartzaile bat abiatu du Udalak xede horrekin.
Gurasoleku ekimena lehen aldiz burutu da Arrankudiagan eta izen-emate andanaren ondorioz pausu berriak eman dira: euskara ikasteko guraso talde bat sortu da ikastetxean, berbalagun talde bat martxan jarri eta familiek aisialdian euskaraz gozatzeko taldea ere abiatuko dute.
Euskararekin korapilatu zaitez!
Arrankudiaga eskolako ikasleek eskualdeko gainerakoei bota diete erronka: Euskararekin korapilatu zaitez!. Aho korapiloak sortu eta Arrankudiaga-Zollo hobeto ezagutzeko proposamena prestatu dute horretarako eta ikastetxe guztietara helarazi. Abenduaren 1ean ikusiko da ekimen honen lehen emaitza.
Berotzen joateko... memealdia
Hirugarren urtez jarraian, martxan da Memealdia, euskarazko memeen lehiaketa. Umorea, sormena eta euskara uztartuko dituzte ekimen horren bidez. Bertan parte hartzeko argibideak Aiaraldeko Euskalgintza Kontseiluaren webgunean daude, eta baita egitasmorako propioki sortutako Instagram kontuan ere. Lehiaketaren sari banaketa Arrankudiagan izango da abenduaren 1ean, jasotako meme guztien proiekzioarekin batera. Iaz 200 memetik gora jaso zituzten, eta erronka bota dute: "aurten baietz gainditu!".
