Bihar, ostirala, 18:00etan Emakumeen Sareak Volar filma eskainiko du Oxinburu Gizarte Etxean. 71 minutuko pelikula dokumentalak indarkeria matxista pairatu duten hainbat emakumeren lekukotzak biltzen ditu eta protagonistetako bat, Inma Mata, egongo da proiekzioan, gero egingo duten mahai inguruan parte hartzeko.
Ekintzaren helburua bikoitza da Emakumeen Sarean aritzen direnentzat. Alde batetik, indarkeria matxistari aurre egiteko trebatzen jarraitzea: "Azaroaren 25eko elkarretaratzearen ostean, Arrankudiaga zein Zolloko emakumeen lekukotzak jaso ditugu, erasoak pairatu dituztelako. Hori ikusita, konturatu gara tresna gehiago behar ditugula horrelako kasuen aurrean. Osatze feministaren bitartez saio bat egin genuen, eta orain sakondu nahi dugu emakumezko jantzi baten bitartez", aipatu dute taldeko kideek.
"Emakume bakoitza mundu bat da eta behar ezberdinak ditu, baina uste dugu Inma Matak lagundu ahal digula egoera hauetan. Berak lortu du indarkeria matxistak sortzen duen egoeratik ateratzea eta ziur esaten diguna oso baliogarria izango dela", erantsi dute.
Espazio segurua
Horrez gain, Emakumeen Sarearen asmoa bada gune segurua erraztea indarkeria matxistari buruz hausnartzeko eta izandako bizipenak azaleratzeko. Horren bidez, taldearen xedea da herriko emakumeak saretzeko beste urrats bat egitea.
