Arrankudiaga-Zolloko Trail Lasterketako antolatzaileek berrikuntza proposatu dute aurtengo proban gatza eta piperra eta elkartasun kutsua jartzeko.
Hain zuzen, larunbateko ohiko lasterketari erronka solidarioa erantsi diote: Goikogane Erronka.
Txirrindulari eta korrilakari bana saiatuko dira 44 minutu baino gutxiagotan Goikoganeko tontorrera heltzen ostiralean.
Zita horretan Aritz Leturiaga eta Ugaitz Lekue arituko dira nor baino nor eta euren helburua izango da ahalik eta lasterren heltzea Goikoganeko tontorrera. Leturiagak korrika egingo du ibilbidea eta Lekuek, aldiz, txirrindulaz.
Eskerrak Ahulak Garen elkarterako diru bilketa
Aritz Leturiagak berak azaldu dio Aiaraldea Komunikabideari ideiaren sorburua: "Trailaren antolatzaileek pentsatu zuten zerbait berria egin ahal zela lasterketa sustatzeko eta aspaldi esaten zen herrian bazegoela jendea zeina 44 minututan igotzen zen Goikoganera. Bururatu zitzaigun dibertigarria izan zitekela hori benetan neurtzea eta modu bitxian egitea. Horretarako, korrikalari eta txirrindulari bana lehiatuko gara".
Egitasmoari, gainera, elkartasun helburua emango diote. "Ez dugu gogoko apustuak eta jokoa sustatzea, baina nahi duenak bere apustua egin dezake bi euro ordainduta. Hori bai, dirua Eskerrak Ahulak Garen elkartera bideratuko dugu, xedea ez da norbaitek irabaztea. Litekeena da tokiko produktuen saski batekin saritzea", erantsi du arrankudiagarrak.
Herritarrek bi euroko apustua egin ahalko dute eta bildutako dirua Eskerrak Ahulak Garen elkartera bideratuko dute.
Leturiagak berak aipatu du Ainhoa Junguituk sustatutako elkartea babestea erabaki dutela, besteak beste, urduñarrak senideak dituelako herrian.
Arrankudiaga-Zolloko Traila larunbatean
Hitzaurre kitzikagarri horren ondoren, larunbatean izango da benetako lasterketa. XII. edizioan goizez eta arratsaldez lehiatzeko aukera egongo da. Hain zuzen, 11:00etatik 11:45ak arte 2018 eta 2012 urteen artean jaiotako haur eta gazte guztiek izango dute beta parte hartzeko.
Arrankudiaga-Zolloko Trail Lasterketak lehiatzeko aukera emango die ume eta gazteei goizez. Mendi maratoi erdia eta lasterketa herrikoia arratsaldez izango dira.
Kategoria bakoitzak bere luzera izango du eta proba hasi baino lehen izena eman beharko dute Javier Escalza futbol zelaian bertan.
Arratsaldean, ordea, Mendi Maratoi Erdia (21,1 kilometro) abiatuko dute 15:30ean eta 16:00etan, aldiz, lasterketa herrikoia (7,9 kilometro). Izena emateko epea jadanik irekita dago eta hemen egin daiteke.