Txomin Egiluzek eta Edurne Ellakuriak erakusketa benetan bitxia prestatu dute 2026. urtea kulturaz blai hasteko Arrankudiaga-Zollon. Hain zuzen, Jose Arrueren, Ruiz Moralesen, Luis Larrinaga Ibarraren eta Lorenzo Borqueren koadroak eta erreprodukzioak jarriko dituzte Oxinburun.
Bilduma horretan ikusi ahalko da lau margolari horiek XX. mendean nola islatu zituzten herriko zenbait txoko. Tokikoentzako egilerik famatuena Jose Arrue izango da. Eskualdean bizi izan zen artistaren pieza anitz eta deigarriak ezagutzeko aukera egongo da. Txomin Egiluzek goraipatu nahi izan du, alde batetik, 1948ko jai egitaraua, berak ilustratua. "Jaien une esanguratsuak margotu zituen eta bere familiak lagundu digu", aipatu du Egiluzek, esker onez.
Horrez gain, Arrankudiagako erromeriari buruzko koadro beraren bi bertsio alderatzeko parada ere egongo da. Egiluzek biziki eskertu du Arozena Museoak bidali duen erreprodukzioa. Berez, irudi bereko bi bertsio dira: Arrankudiagako erromeria eta Euskal erromeria. Hori gutxi balitz, Jose Arruek koadro hori margotzen zuen bitartean egindako argazki bat ere lortu dute.
Bitxikeria gehiago
Baina Arrue ez da protagonista bakarra izango. Bernardino Manuel Ruiz Sanchez Morales (Ruiz Morales) artistak ere utzi zuen bere aztarna herrian. Granadakoa jatorriz, Aretan bizi izan zen eta bere artelanek balio handia daukate egun. Orozkon edota Zeberion ere margotu zuen eta erakusketan burdinola baten, San Anton Azokako eta Otxanduriko dorretxeko koadroak aurkeztuko dituzte.
Luis Larrinaga Ibarra Arbiden bizi izan zen eta herritarrek eurek zenbait lan lagako dituzte. Lorenzo Borqueren kasuan, nahiz eta Soriakoa izan, Zolloko errota bat margotu zuen eta Egiluzek uste du interesgarria dela: "Jadanik errota horren horma bat baino ez da geratzen".
Hori guztia gutxi izango balitz, 1775ko errege bideko mapa baten kopia egin dute, inguruan zeuden baserriak biltzen baititu.
Erakusketa egunak
Erakusketaren inaugurazioa urtarrilaren 2an izango da 19:00etan. Urtarrilaren 3an 19:00etik 20:00ak arte bisitatu ahalko da eta 4an 12:30etatik 14:00ak arte.