Berdintasun Arloak sustatuta, Artziniegako elkarteek batera osatu dute 2018ko egutegia. Hilabeteka, elkarteei eman diete protagonismoa, berdintasuna egunerokotasunean aldarrikatzeko asmoz. Miren Urresti Azpirik azaldu duenez, Berdintasun Forotik bultzatu dute ekimena, Artziniegako Udalaren laguntzarekin. "Helburua herriko elkarteak berdintasunaren aldeko konpromisoa erakustea izan da, denon premia baitago berdintasunaren alde egiteko, indarrak metatzea ezinbestekoa delako helburua lortze aldera".
Horretarako bertako elkarte, talde eta norbanakoen laguntza izan dute. Argazkilari eta diseinatzaile lanetan Artziniegako argazkilariak aritu dira, Arima Studioa, hain zuzen.
Partaide ugari
Gauzak hala, hilero pertsona edo talde batengan jarri dute fokua. Urtarrilean, esaterako, Barratxi Guraso Elkartekoak izango dira nagusi, otsailean Artea Etnografia Elkartea, martxoan Hiriska, apirilean Txirrindulari elkartea, maiatzean Prakanasiak kuadrila... Artziniegako Rock elkarteak eta Pilota eskolak ere hartu dute parte, baita Otsati, Artzikirol edota Builaka perkusio taldeak. Norbanakoen artean, Nagore garraiolariaren ekarpena, Jon eta Igoarena nabarmendu dituzte.
Egutegia eskuratzeko udaletxera jo behar da. Urtarrilaren 2tik aurrera egongo dira eskura udaletxean, eta urtarrilaren 8az geroztik liburutegian ere bai. Alea doan banatuko dute. "Artziniegako Udalak eskerrak eman nahi dizkie parte hartu duten elkarte, talde eta banakakoei eta, era berean, animatu nahi ditu herritarrek egutegia eskura dezaten, etxeetan ere berdintasunaren aldeko mezua egon dadin". Udalak Aldundiaren eta Vital Fundazioaren diru-laguntza izan du egutegia egiteko.