Txirrindularitza lasterketa baten atzean ezkutatzen den guztia azaleratzea da Aiara Txirrindula Elkarteak antolaturiko El otro ciclismo hitzaldiaren helburua. Goi-mailako kirol profesionala hainbat alorretatik aztertuko dute eta kirol horrek nazioartean dituen joerak ere izango dituzte hizpide, Asia eta Afrikako txirrindularitza aztertuaz, besteak beste.
Artziniegako Museoan jarri dute hitzordua, abenduaren 26an, 19:30ean. Sarrera doakoa izango da.
Goi mailako zortzi hizlari
Zortzi hizlarik osatuko dute mahaingurua. Txirrindulari profesionalak ez ezik, kazetariak, txirrindularitza epaileak edota prestatzaile fisikoak ere egongo dira Artziniegako zitan.
Mikel Landa Movistar taldeko txirrindularia, Igor Anton Team Dimension data for Qhubeka taldeko kirolaria eta Ricardo Garcia Euskadi Fundazioko txirrindularia egongo dira bertan egungo txirrindulari profesionalen ikuspuntua eskainiz. Joseba Beloki txirrindulari ohiak ere parte hartuko du mahai inguruan.
Lasterketen aspektu teknikoagoetan sakonduko duten lau aditu ere egongo dira solasaldian: Ainara Hernando, Ciclismo a Fondo aldizkariko kazetaria; Veronica Cano, txirrindularitza arbitro-epailea; Aritz Arberas, Astana taldeko prestatzaile fisikoa eta, azkenik, Tomas Amezaga, Movistar taldeko mekanikaria.