Artziniega Museoa berriz irekitzeko finantza akordioa erdietsi dute udalak, aldundiak eta Eusko Jaurlaritzak

Hainbat elkarretaratze egin dituzte museoaren itxieraren aurka. / Aiaraldea.eus

35.000 euroko diru-laguntza bana bideratuko dute Eusko Jaurlaritzak eta Arabako Foru Aldundiak. Erabakia “pausu garrantzitsua” da, Artea etnografia elkartearen ustetan.

Akordioa egin dute Artziniegako Udalak, Arabako Foru Aldundiak eta Eusko Jaurlaritzak Artziniega Museoa berriz irekitzeko finantzazioa bermatzeko. Aldundiak nabarmendu duenez, azken egunetan bilera ugari egin dituzte hiru erakundeen artean, modu horretan “museoa berri irekitzeko adostasuna” lortuta.

Honakoa da adostu dutena: Eusko Jaurlaritzak eta Arabako Foru Aldundiak 35.000 euroko diru-laguntza bana bideratzea “museoaren funtzionamendu eta gestio gastuak ordaintzeko”. Bideragarritasun plan bat egitea ere adostu dute, museoaren beharrak identifikatu eta “XXI. Mendeko museo” izatera iristeko. “Bideragarritasun Plan honek museoaren behar ekonomiko zehatzak ezagutzen lagunduko du, honela bi erakundeen laguntza hau nahikoa den jakinez eta, behar gehiagoren beharra izatekotan, Artziniegako Udalaren laguntzaren konpromisoa izanda”.

Bilera astelehenean
Aldundiak nabarmendu duenez, Artea etnografia elkartearen “parte hartze zuzenarekin” garatuko dute plana. Elkarteko kideen aburuz, “pausu garrantzitsua” da erdietsitako akordioa. “Harritzekoa da azken urtebetean soluzio bat bilatzeko ezintasuna egon izana eta orain, bat-batean, konpondu ahal izatea”, nabarmendu du Mateo Lafraguak. Elkarteko kideak jakinarazi du ostiralean bilduko direla erabakia baloratzeko, eta beste bilera bat egingo dute Aldundiarekin astelehenean. “Bilera horretan jasotzen dugun informazioaren arabera museoa asteartean bertan irekitzea baloratu dezakegu”

Ekimen ugari itxieraren aurka
Ia bi hilabete igaro dira Artea etnografia elkarteak museoa “finantziazio faltagatik” ixtea erabaki zuenetik. Orduz geroztik makina bat ekimen jazo dira herrian museoa berriz martxan jartzeko. Artziniega Museoa bizirik! Plataformaren sortu da eta elkarretaratze jendetsuak antolatu ditu konponbide bat eskatzeko. Sinadura bilketa ere abiatu zuten, eta milaka lagunen babesa jaso zuten oso egun gutxitan.

Oharra: Eduki hau herritar eta bazkideen laguntzari esker plazaratu da, Artziniegako Udalak tokiko euskarazko hedabide bakarra ekonomikoki ez babestea erabaki baitzuen.

Erlazionatuak

Artziniega Museoaren aldeko testua onartu dute Batzar Nagusietan, aho batez

Artziniega

Hitzarmena sinatzeko deia luzatu diete Arabako Foru Aldundiari, Eusko Jaurlaritzari, Artziniegako Udalari eta Arte Etnografia Elkarteari.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide