Udalaren ekitaldi bat “modu elektoralistan” erabiltzea leporatu dio Artziniegako EH Bilduk EAJri. “Encina Castresana alkategai jeltzaleak alderdikeriaz erabili du ohitura musulmanei buruzko hitzaldi bat. Solasaldia Udal Liburutegiak antolatu du eta hautagaiak ekitaldia bere egin du eta bere interesetarako erabili du”.
Oposizioko talde politikoak azaldu du hitzaldi hori “Artziniegan bizi diren emakume musulmanek” eskainiko zutela, “baina Encina Castresanak eman zuen”. “Ustekabea” hurrengo egunean jaso zutela salatu du EH Bilduk, EAJren alkategaiak hitzaldia bere hautagaitza sustatzeko Facebook orrialdean nola aipatzen zuen ikusi zutenean. “Gure harridurarako, ekitaldiaren antolatzaile gisa agertzen zuen bere burua, eta gainera bere hautagaitzak darabilen #EncinaPrest etiketa idatzi zuen; horrek aditzera ematen du udalaren ekitaldi bat ekitaldi elektoral bihurtu zuela”.
_content.jpg)
EH Bilduko kideen arabera, gertatutakoa “onartezina” eta “salatzeko modukoa” da. “Are gehiago kontuan hartzen badugu Iñigo Gomez alkateak duela egun gutxi inolako justifikazio barik eta udal ordenantzetan oinarritu barik kendu zuela EH Bilduk udal igerilekuetan jarritako kartel bat. Horrek argi utzi zuen urduri daudela berriz ere galduko dituzten hauteskunde batzuk datozelako”.
Iñigo Gomez alkatearen erantzuna
Iñigo Gomezek, bere aldetik, Encina Castresanaren jarrera babestu du. “Encinak urte asko eman ditu emakume musulmanekin lanean. Eurek eskainiko zuten hitzaldia baina azken unean lotsa sartu zitzaien eta Encinak eskaini zuen”.