Arteko Gure Amako taberna irekitzeko kudeaketa kritikatu du EAJk

Arteko Gure Amako taberna. / Artziniegako EAJ

Informazioa zabaldu ez izana leporatu diote gobernu taldeari jeltzaleek. EH Bilduk ohiko bideak erabili dituela nabarmendu du.

Arteko Gure Amako taberna zabaltzea ekimen ona da, EAJren aburuz. Prentsa oharrean adierazi dutenez, EAJk diru-laguntza eskatu zuen eraikina hobetu eta irekitzeko. “Egindako obrek zabaltzeko behar diren baldintzak betetzen dituzten jakiteko informe teknikoa eskatzen dugu”. Era berean, udal idazkariaren txostena ikusteko eskaera egin dute, gobernu taldeak zerbitzua esleitzeko ateratako oinarriak legalak direla baieztatzeko. “Gainera, sorpresaz hartu dugu udalaren publizitate eskasa tabernaren berria zabaltzeko”. Hori dela eta, sare sozialetan, webgunean eta bandoetan argitaratzea eskatu dute, “bizilagun guztiek izan dezaten oinarriei buruzko benetako informazioa eta gardena, udalera baldintzen berri jasotzera jo behar izan gabe”. Aipatutako txosten tekniko eta juridikorik ezean, irailerako ekimena bertan behera utzi beharko litzateke, jeltzaleen aburuz, “interesdunei molestia eta arazoak ekiditeko; arduragabekeria politikoaren ondorioz”.

Joseba Elejalde PPko zinegotziak sare sozialetan erantzun dio jeltzaleen oharrari, diru-laguntza eskaera hori PPk bideratu zuela argitzeko. Kezkati azaldu da PPko kidea: “Lokal hori kontratua egunean ez zegoelako itxi zen, eta orain lortu dela, inori ez zaio interesatzen Arteko Gure Amaren egunerako hartzea”.

Joseba Vivanco EH Bilduko gobernu buruak Aiaraldea hedabideari aipatu dionez, ohiko komunikazio bideak erabili dituzte herritarren eta elkarteen artean aukera zabaltzeko: udalaren Whatsappa, sare sozialak eta bandoa. “Ez da norbanako ez kolektiborik prest azaldu taberna irekitzeko, horregatik geratu da itxita. Lehenbizi elkarteentzat ireki genuen aurkezteko epea, eta ondoren herritarrentzat”. Txostenen harira, udaleko aparejadorearen esku dagoela erantsi du, “eta oinarriak txosna jartzeko baimenaren oso antzekoak dira”.

Erlazionatuak

Arteko Landako taberna ireki nahi du udalak

Artziniega

Taberna udan funtzionatzea da tokiko erakundearen asmoa.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide