Otsailaren 20an Letterkenny hiri irlandarrean egindako Munduko Sokatira Txapelketan aritu zen Bizindar talde artziniegarra.
Hasiera gorabeheratsua izan zen aiaraldearrentzat, Aintzane Lafraguaren arabera: "Bidaia oso luzea izan zen eta berandu heldu ginen pisaketara, kide bat falta zitzaigun eta ez genekien funtzionamendua. Urduritasun uneak bizi izan genituen".
Hala ere, dena ondo joan zen eta tiraldietan oso sentsazio onak izan zituzten kirolariek. "Batez ere, Euskal taldeen kontra. Atzerritar taldeen tira egiteko modua desberdina da eta nekeza da haien kontra eroso egotea", aipatu du Lafraguak.
Artziniegarrak argitu du esperientzia eskuratzea zela euren helburua eta oso positiboa izan dela bizipena: "Taldeari bultzada eman dio, nahiz eta gehienak berriak izan, eta hurrengo urteko Munduko Txapelketan dugu burua jadanik".
Hala ere, Lafraguak azpimarratu du kide gehiago behar dituztela. Berez, Irlandan 580 kilo azpiko kategorian lehiatu ziren, esparru mistoan, hiru neskek eta sei mutilek parte hartu baitzuten, baina 541 kilora bakarrik heldu ziren.
