Koronabirusaren ondorioz sortuko diren kalte ekonomikoak leuntzeko neurriak hartzeko eskatu dio EAJk alkatetzari. Ohar batean adierazi dutenez, komertzio txikiei eta ostalaritzari “erraztasunak eta laguntza ekonomikoa” ematea izango da neurri horien helburua.
Oposizioko alderdiaren bozeramaileak, Encina Castresanak, adierazi du gobernuak ezarritako alarma egoerak, biztanleen zirkulazio librean eta beste hainbat eskubidetan eragina izateaz gain, “komertzioen, establezimenduen eta ostalaritzaren itxierak sortutako galera ekonomikoetan" ere eragina izango duela.
Hortaz, “Joseba Vivanco alkateak eta udal gobernuak arlo ekonomikoan inolako neurririk ez dutela hartu ikusita”, laguntza ekonomikoen “salbuespenezko deialdi urgentea” egitea eskatu du Castresanak.
Lau proposamen hauek plazaratu dituzte jeltzaleek: saltoki txikien, ostalaritzaren eta antzekoen itxierak sortutako kalte ekonomikoak murrizteko laguntzak bideratzea, soldatarik gabeko baimenak eta baliokideak konpentsatzeko laguntzak ematea (hezkuntza zentroen itxiera dela eta), 12 urtetik beherakoen zaintzaren zailtasuna arintzeko partidak sortzea eta, nagusi eta zaintza zentroen itxiera dela eta, dependentzia duten pertsonen zaintzak sortutako zailtasunak leuntzea.
Alkatearen erantzuna
Vivancok, bere partetik, Alderdi Popularrak antzeko proposamenak erregistratu zituela erantzun du. Dena den, “krisiaren txarrena pasatzean” laguntzen afera tratatuko dutela gehitu du, beste erakunde publikoekin batera. Hala ere, egoera honek sortutako zailtasunak konpontzeko udal gobernutik asko lan egiten ari direla esan du Vivancok, eta EAJren elkarlanera irekita daudela nabarmendu du.