Udal gobernuak koronabirusaren krisia nola kudeatu duen kritikatu du EAJk

Artziniegako osoko bilkura baten irudia. / Aiaraldea.eus

Jeltzaleen arabera, herritar guztientzako maskarak erosi beharko lituzke udalak. 

Artziniegako EAJk maskarak erosteko mozioaren kontra bozkatu izana kritikatu dio EH Bilduko udal-gobernuari. Era berean, Alderdi Popularreko ordezkariaren proposamenen alde daudela gehitu dute jeltzaleek ohar batean (PPko zinegotziak egin zuen proposamena, hain zuzen ere), alkatetzak aitzakia ekonomikoak edo konpetentzien ingurukoak jartzen dituela gehituta.

Covid-19ak sorturiko krisi ekonomikoari aurre egiteko neurriak falta direla ere gehitu dute oposizioko alderditik. EH Bildutik “neurriak ikertzen eta beste instituzioen ekintzak” itxaroten ari direla kritikatu dute ere: “Beste era batera esanda, ez dakite zer egin eta neurri horiek besteok erraztea espero dute”.

Hortaz, EH Bilduko udal gobernutik jarduteko plan edo neurri konkretuak ez izatea salatu dute. Horren harira, udal azpiegituren irekierari begira, higiene plan konkretua ez izatea leporatu diote alkatetzari, joera “harrigarria eta kezkagarria” dela nabarmenduta.

Gainera, aste honetan egindako osoko bilkuran aurreko legegintzaldiarekiko jarraikortasuna argi geratu zela ere adierazi dute, EAJk jada jorratutako hainbat obra onartu zirelako. Horren harira, landutako puntuetako bat soldata igoera izan zela adierazi dute.

Maskaren erantzukizuna
Maskarei dagokionez, Joseba Vivanco alkateak azaldu du mozioaren kontra bozkatu zutela haien erosketa udalaren erantzukizuna ez dela ulertzen dutelako. Vivancoren ustez, Espainiako Gobernuak maskarak beharrezkoak direla esango balu, gobernuak berak bermatu beharko lituzke.

Bestalde, alkateak nabamendu du ez direla neurri zehatzak falta, eta gehitu du Artziniegako herritarrak direla euren lana baloratu behar dutenak, ez EAJ. Hortaz, neurriak hartzen jarraituko dutela adierazi du, nahiz eta beste instituzioen erabakien esperoan daudela aitortu.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide