Asteartean Goiko plazako inguruan bizi den familia batek bi hontz-zuri topatu zituen bere etxean. Udalarekin harremanetan jarri eta gero, herritar batek eraman zituen eta Martiodako basa animalien suspertegiarekin jarri zen harremanetan euren esku uzteko.
Edonola ere, gau horretan familia berak beste bi ale aurkitu zituen eta aipatutako herritarrak jaso zituen. Atzo Martiodako zentroak hartu zituen bere gain.
Espazio horren arduradun batek Aiaraldea hedabideari azaldu dio hontz-zuriak txitak direla oraindik, baina bere kabuz baliatzeko gai izatetik gertu daudela. "Ikusi behar dugu onartzen duten guk elikatzea eta hala bada, haragi zati txikiak ematen hasiko gara. Gero handiagoak eta, azkenik, aztertuko dugu ehiza egiteko gaitasuna duten. Horrela izanez gero, askatuko ditugu".
Laudion erreskatatutako orkatza hil zen
Bide batez, Martiodako langileak jakinarazi du larunbatean Laudion larrialdi zerbitzuek tratatutako orkatza egun berean hil zela: "Lan asko izan zuten zaintzaileek egun horretan, baina joan zirenean ikustera zein zen animaliaren egoera, orkatza hilik zegoen. Ez dakigu zaurien edo estresaren ondorioz izan ote zen".
Landaluze auzoan aurkitu zuten animalia larunbatean, txakur batek eraso eta gero.