Artziniegako ur hornidura sarea berritzeko lanetan dabil udala. Horrek, baina, zenbait moldaketa egin beharra suposatu du Alde Zaharrean. Aparkatzeko guneen aldaketa da horietako bat, "Hiriko Atea" deritzon eremua barne.
"Jarduketa aprobetxatuta espazio hori urbanizatuko dugu, espaloiak zabalduz eta aparkalekuak berriz diseinatuz", azaldu du tokiko erakundeak oharrean. Atzo hesitu zuten eremua, baita Villa Felisa kantoikoa ere. "Asteartetik aurrera aparkaleku osoa itxiko zaie ibilgailuei bi hilabetez", zehaztu dute. Horrek oinezkoen pasabidean ere eragingo du.
Aparkatzeko tokien mapa
Obrak dirauen bitartean -otsaila amaiera arte- udalak gune batzuk egokituko ditu aparkatzeko. Mapa osatu eta zabaldu dute horretarako:
Asteazkenetik aurrera egongo dira abian aparkaleku horiek. "Sortuko diren eragozpenak ulertzen jakingo dutelakoan, beste leku batzuetatik Hirigune Historikora autoz hurbildu ohi direnei ere dei egiten diegu ibilgailua erabili gabe bertara daitezen", azpimarratu dute.
Ondorengoak dira aparkatzeko behin-behineko txokoak:
- Barrenkaleko orubea
- Artekale plaza
- Goienkaleko parrokia ingurua
"Edukiontzien bateria, berriz, La Encina egoitzaren pareko espaloiaren gainean kokatuko da", ohartarazi dute.
Udal aurrekontuen zirriborroan jaso dute ur hornidura sarea berritzeko diru-partida. Hodi orokorra berritu eta Gordelizerainoko kanalizazioa eraikiko dute, “Barratxi zubitik Bentara doan bideko Arrazuriako Presa eta San Antonio arteko lehen zatia hastearekin batera”.