2.186.563,08 euroko aurrekontua izango du aurten Artziniegako Udalak, iaz baino 36.000€ gutxiago. Arabako Foru Aldundiko diru-laguntzaren zenbatekoa ere badakite dagoeneko, 942.921€. Joseba Vivanco alkateak azaldu duenez, iaz baino 100.000€ gutxiago izango ditu orotara tokiko erakundeak. Inbertsioetara bideratuko dute diru gehiena, eta ondorengo lanak gauzatuko dituzte aurten:
- Ur saneamenduaren sarea berritzea (frontoiko aparkalekuaren urbanizazioa barne)
- Gordelizera ura eramateko sarea egokitzea (Barratxi zubitik Bentarako bidea barne)
- Dorre-hotelaren eraikinaren atonketa
- Arteko Landako komunen berriketa eta informazio panelak jartzea bertako zuhaitzak ezagutarazteko
- Eskolako argiztapen sistema aldatzea eta haurreskolako estalgunea konpontzea
- Frontoiko eta futbol zelaiko argiztapen sistema berritzea
- Alde Zaharrerako sarbidea hobetzea
- Artziniegako ibilbideak seinalizatzea
Gizarte Langilearen jarduna handitu egin dute jada, Vivancoren hitzetan: "Oso garrantzitsua da guretzat 2.5 egunez egotea gizarte langilea, baita 3.000 euroko partida berri bat gehitzea larrialdi laguntza berezietarako". Horrez gain, arkitekto eta aparejadorearen kontratua handitu dute astean bi orduz.
Bestelako egitasmoak ere jakinarazi dituzte. Udalbiltzak, esaterako, kultur egitasmo euskaldun bat sustatuko du Artziniegan, Euskal Herriko beste 20 tokitan bezala. "Kultura Etxeko erreforma proiektuaren erredakzioa ere aurten egingo dugu, eta Hiri Antolamendurako Plan Orokorraren esleipena ere".
Alkatearen hitzetan, Artziniega hobetzeko jarraituko dute lanean: "Parte hartzerako hainbat bide zabaldu nahi ditugu, Antzinako merkatutik hasi eta kiroldegiaren etorkizuna erabakitzeraino, komertzio eta turismoaren sustapen planak ahaztu gabe". Bestalde, Artziniega Museoa fundazio bilakatzeko bidea ere jorratuko dute Arabako Foru Aldundiarekin eta Artea Etnografia Elkartearekin, "bideragarritasuna bermatzeko".
EAJren kritikak
EAJk, bere aldetik, prentsa oharra atera du jeltzaleen zenbait proposamen aintzat hartu ez direlako: "Ez dugu anbiziorik ikusten Artziniegaren etorkizun, erronka eta berrikuntzarekiko; ezta gure herriak eboluzio eta etengabeko hobekuntza arloan izan behar dituen erronka garrantzitsuekiko ere". Aurrekontuak iragan udalbatzan onartu ziren, proposamenaren aldeko EH Bilduren 5 botorekin, eta EAJren kontrako 3 bozekin.