Prentsa oharra plazaratu du Artziniegako EAJk iragan astean eginiko Udal Osoko Bilkura dela eta. Jeltzaleek azaldu dute hainbat proposamenen alde egin zutela plenoan, “herritarren bizi kalitatea hobetzera” bideratuak zeudela ulertuta. Arabako Kontratazio Zentralari atxikitzeko hitzarmena, baso-aprobetxamenduen plana eta euskara ikasteko laguntzak arautzen dituen araudia babestu zituzten EAJko kideek, besteak beste.
Erregu eta galderak
Erregu eta galderen puntuan, aldiz, hainbat gauza galdetu zien opozisioko taldeak udal gobernuari. “Ur-mozketa etengabeen” gaineko kezka plazaratu zuten jeltzaleek, eta uraren kalitatean “gorabeherak” daudela ere ohartarazi zuten, txorrotatik kolore marroiarekin ateratzen dela argudiatuta. "Udal talde jeltzaletik uste dugu obra orok eragozpenak dakartzala, baina herritarren etengabeko kexak ikusita, uste dugu udal gobernuak ez diela arreta gehiegiirik eskaintzen”.
Artziniegako Dorrea Hoteleko obren inguruan ere galdetu zuten EAJko kideek, eraikinak itxita bi urte daramatzala nabarmenduta, “egokitze-lanak amaitzeko data zehatzik gabe eta udalerriko hain eraikin enblematikoa izango duen erabilera-plan zehatzik gabe”.
Igerilekuko obren inguruan ere galdetu zuten jeltzaleek. Puntu horretan, udal gobernuko kideek erantzun zuten obrak egin zituen enpresak isuna jasoko duela, eraikitze prozesuan egondako atzerapenengatik.