Artziniegako Lucart papertegian egon dira Iñigo Urkullu eta Arantxa Tapia. Ekoizpen linea berriaren inaugurazioa dela eta bertaratu dira Eusko Jaurlaritzako bi ordezkariak lantegira.
Lehendakariak positiboki baloratu du enpresaren ekimena, “eskualdearen gaitasun industrialaren, nazioartekotzearen eta enpleguaren aldeko apustua” dela iritzita. “Gaur egun 224 langilek egiten dute lan papertegian. Enplegua sortu eta papertegi zaharra berpiztea lortu da, etorkizunerako proiektu batekin”. Era berean, Eusko Jaurlaritzako buruak nabarmendu du Lucarteko zuzendaritzak 20 milioi euro baino gehiago inbertitu dituela fabrikako azpiegituretan”.
Enpresaren jarduna goraipatu du Urkulluk, “ekoizpen jasangarri eta arduratsuaren adibidea” dela iritzita. “Enpresak ekonomia zirkularrean inspiratutako ekoizpen ereduak baliatzen ditu, pertsonak babestu eta planetaren etorkizunera begira ekarpena egiteko. Konpromiso horri ezker, azken 8 urteetan atmosferara 170.000 tona CO2 isurtzea ekidin du enpresak”.
Tubacex hizpide
Eskualdeko enpresa taldea ere izan da protagonista, nola ez, eta Arantxa Tapia Ekonomia Sailburuak adierazi du atzoko erabakiarekin espero duela lan gatazka bukatzea. Ordezkariak erantsi du lan karga dagoela enpresan eta ekoizpena berriro abian jartzea dela bere itxaropena.
Positiboki baloratzen dugu #TUBACEX'eko Zuzendaritzaren eta Enpresa-Batzordearen arteko balizko akordioa.
— Arantxa Tapia (@arantxa_tapia) July 21, 2021
Bitartekaritza lanik egin ez badugu ere, konponbidea bilatzen saiatu gara. Irtenbide posible bat esploratzea izan da gure nahia.#EkonomiarenGarapena pic.twitter.com/ZPkCwEKA5d
Horrez gain, azaldu du ez dela Eusko Jaurlaritzaren lana bitartekari lanak egitea eta Tubacexeko zuzendaritzaren eta sindikatuen artean konpondu behar dutela afera.
Ekoizpen linea berrian, 4 milioi euroko inbertsioa
Inauguratu berri den ekoizpen linea erabat automatikoa da, eta eskuetako toalla sikuak egitera bideratuta dago. 4 milioi euro inbertitu ditu enpresak makina horren erosketan.
Enpresaren kudeatzailea den Massino Pasquinik ere hartu du hitza bisitan, eta EAEko lantegietan inbertitzen jarraituko dutela ziurtatu du, hemengo fabriken kokapena “estrategikoa” delako, “iberiar penintsulako, Frantziako eta Ingalaterrako merkatuekin konexio hona ahalbidetzen duelako”.
Lucartek 2018. urtean erosi zuen Artziniegako papertegia. Beste bi azpiegitura ditu EAEn: Arangurengo fabrika eta Gueñeseko biltegia. Baliabide horiekin, urtero 50.000 tona paper ekoizten ditu EAEn.
Multinazional italiarra da Lucart. 7 enpresek osatzen dute taldea.