Artziniegako emakumeen historia aitortu eta sozializatzeko proiektua aurkeztu du Udalak. Liburu bihurtu dute Artziniegako belaunaldi eta eremu desberdinetako emakumeen ibilbide oro.
Ekitaldi jendetsua egin dute frontoian ekimena aurkezteko. Liburuko partaideek euren gogoetak partekatu dituzte Inma Roiz idazleak gidatutako solasaldian
Ekitaldi jendetsua egin dute frontoian, ekimena aurkezteko. Liburuko partaideek euren gogoetak partekatu dituzte Inma Roiz idazleak gidatutako solasaldian. Hain zuzen, Roiz izan da Artziniegako emakumeen historiari hitza jartzeaz arduratu dena. Ekintzak eta testigantzak, ordea, herritarrek zein eragile desberdinek partekatu dituzte. Horren adierazle izan da aurkezpen ekitaldia.
Joseba Vivanco alkateak eta Aintzane Iturribarria feminismo zinegotziak herriko emakumeen historia biltzeko proiektua aurkeztu dute lehenbizi. Inma Roiz idazleak hartu du hitza segidan, eta zenbait galdera luzatu dizkie liburua istorioz josi duten emakumeei.
Esaterako, Hiriskako kideek emakume elkarteak 30 urteko ibilbidean izandako bilakaera kontatu dute, ahalduntzea euren bizitza pertsonaletan zein kolektiboan nola garatu den azalduz. Artziniegako Talde Feministako kideek, ordea, saretzen jarraitzeko konpromisoa berretsi dute.
Agurtzane Llano izan zen Artziniegako lehenbiziko alkate emakumea, eta politikan lehen lerroa hartzeak suposatu zion aldaketa eta ahalduntzea aipatu ditu. Zuriñe Frutos kirolariak, bestalde, eremu horretan bizitako zapalkuntzak izan ditu hizpide. Paki Ofizialdegik eta Teresa Lafraguak, berriz, museoetan eta artean emakumeen aitortzaren beharrezkotasuna azpimarratu dute. "Artziniega Museoan emakumeari gizonari adina espazio ematen zaio, eta azalpenetan ere hori transmititzen saiatzen gara belaunaldi berriei", erantsi du Ofizialdegik. Encina Castresanak, aldiz, emakume etorriberriekin eginiko lana izan du hizpide. Ekitaldiari amaiera emateko, Artziniegako koro feministak bi abesti jo ditu:
Horrez gain, Aiaraldeko Mugimendu Feministaren historia eta argazki erakusketa jarri dute ikusgai goiz osoan zehar. Liburuak astelehenetik aurrera egongo dira eskura Artziniegako Udalean, eta ale bana banatuko dute doan herrian dauden etxebizitza guztietan.