Artziniegako Udal Gobernu Taldeak bilerak izan zituen pasa den astean Eusko Jaurlaritzako hainbat ordezkarirekin finantzazioari buruz mintzatzeko. Izan ere, Turismo Sailak 25.000 euroko ekarpena egingo dio Udalari, Hiribildu izendapenaren 750. urteurrena ospatzeko.
Goio Zurro Turismo zuzendariarekin batu zen alkatea eta, besteak beste, azaldu zion zertan datza prestatu duten egitaraua. Halaber, Joseba Vivancok aipatu zion Udalak ahalegin handia egin duela, dituen bitarteko urriak aintzat hartuta, herrian turismoa sustatzeko.
Bestalde, Kultura Sailak 800.000 euroz hornituko du tokiko erakundea eta diru horren xedea izango da alde zaharrean kokatuta dauden Kultura Etxea eta dorretxea egokitzea. Horretarako lanak egikaritu beharko dira eta, zehazki, dorretxea hotela bilakatzea da asmoa.
Gai hori lantzeko Andoni Iturbe Kulturako Sailburuordeak eta Mikel Aizpuru Ondare Zuzendariak bisitatu zuten Artziniega. Besteak beste, Udalari azaldu zioten zer nolako urratsak bete beharko dituen tokiko erakundeak dirua jasotzeko hurrengo bi urteetan.
Kultura Saileko konpromisoaren jatorria, zehazki, Aiaraldea berpizteko Eusko Legebiltzarrean onartu zen plan sozioekonomikoa da. 24 eta 26 milioi euro arteko inbertsioa utziko du egitasmoak eskualdean guztira.