Artziniega Museoak 'Museo bizia' ekimena jarri du abian berriro. Azken 2 urteetan ez da tailerra egin, koronabirusak eragindako pandemiaren ondorioz. Hala ere, ohiturari heltzeko apustua egin du berriro Artziniega Museoak. Hala, larunbat honetan -apirilak 23- elkartuko dira bertan, 11:00etatik 14:00etara, antzinako usadioak modu praktiko eta ludikoan transmititzeko.
"Espazio bakoitzean artisauek aintzinako ogibideak erakutsiko dituzte. Hala ere, okinarena izango da lanbide nabarmendua, eta bisita amaieran labean sartuko dituzte egindako ogiak"
"Asteburuetarako planak bilatzen? Hurrengo 23an, apirilaren larunbata, Museo Bizira etor zaitez antzinera bidaiatzera. Artisaua eta Artea Elkartearen hainbat lagunek museoari bizitza emango diote. Aurten, ogiaren oratzea izango da ogibide gailena", zehaztu dute sare sozialetan.
"Bisitak egingo ditugu museoan zehar", adierazi dio Aiaraldea Komunikabideari Paki Ofizialdegik. "Bisita bakoitza gelaz gela pasatuko da, eta espazio bakoitzean artisauak topatuko ditu ikusleak, ogibide biziak erakusteko. Ogiarena izango da lanbide nabarmendua: sukaldetik pasatzean ogia nola egiten zuten azalduko dute, eta bisita bukaeran labera sartuko dituzte partaideek ogiak, eta egosita aterako ditugu gero".
Bisita gidatua izango da, eta 4 euro balioko ditu txartelak. "Gutxi gorabehera ordubete eta laurden -edo ordu eta erdi- iraungo du saio bakoitzak", aurreratu du Ofizialdegik. Dena den, ez dute arazorik aurreikusten ordutegi aldetik, pertsona bat egongo da taldeak antolatzen, eta 10-15 minuturen bueltan abiatuko dira taldeak txokoz txoko.
