Antzinako azoka berreskuratu dute Artziniegan. Goizetik gauerako programazioa atondu dute horretarako, eta mendeetan atzera murgildu dira ehunka lagun giro ederrean. 10:55ean ireki dute hiribildua Alañaren adar hotsek, eta ondoren irakurri dute pregoia, bufoi, gaitajole, pikaro, klero eta gorteko jendea lagun. Hala, herritar ugarik atera dituzte armairuetatik denbora luzez gordetako jantziak.
Goizean zehar Builaka batukadaren kale animazioa, ardien ile mozketa erakustaldiak, Bleibet abesbatzaren emanaldia eta marmelada gozoen dastaketa egon dira, besteak beste.
Arratsaldean, aldiz, ehiza hegaztien hegaldia egingo dute 18:30ean, ekintza askoren artean. Alabaina, egun osoan zehar jarduera asko ikusteko aukera egongo da, hala nola igeltsu freskoaren margoketa, Artea Etnografiaren sutegira bisita gidatuak, txakolina egiteko erakustaldia... Funtsean, artisauek euren lanbideak irakatsi eta euren sorkuntza piezak erakutsiko dituzte. Horien artean, Alañak 50 adarrekin hornitu du postua, eta horietako bakoitzean 'Aita gurea' idatzi du munduko hizkuntza ezberdinetan. Hiru kaleren artean, beraz, denbora kutxa bilakatu da Artziniega gaurko egunean.