Artziniegako Udalari 700.000 euroko dirulaguntza bideratzea onartu zuen Eusko Jaurlaritzako Gobernu Kontseiluak iragan astean. Zehazki, Kultura Etxea eta Ortiz de Molinillo y Velasco Dorrea eraberritzeko lanak ordaintzeko baliatuko dute diru hori. Horri gehitu behar zaio beste 450.000 euro Leader programatik eta Next Generation funtsetatik helduko direla.
Hain zuzen, Kultura Etxea egokitzen eta hobetzen ari dira une honetan. Dorrea, aldiz, hotel moduan ireki nahi dute.
Kultura Etxean aldatu nahi dituzten elementuak kentzeari ekin diote jadanik eta abuztuan hondakin guztiak eramango dituzte, irailean bertan lanekin hasteko.
Esku hartzearen xedea da egitura egonkortzea, irisgarritasuna bermatzea, energia eraginkortasuna hobetzea, edukiera handitzea eta espazioaren banaketa aldatzea.
Dorrean, enpresa eraikitzaileaz nazkatuta
Ortiz de Molinillo y Velasco Dorrean egoera bestelakoa da. Hotela ireki nahi dute han, 2016an itxi ostean, baina Joseba Vivanco alkateak adierazi dio Aiaraldea Komunikabideari behin eta berriro exijitu diotela enpresa eraikitzaileari erremateak bukatu behar dituela, irekitzeko ahalik eta lasterren, "baina ez dute momentuz egin", azaldu du udal buruak.
Haserre hori gehitzen zaio Udalak 100.000 euroko dirulaguntza galdu zuela iaz enpresa berak -Construcciones Aplibur konpainiak- ez zituelako lanak amaitu ezarritako epearen barruan.
Diego Ortiz de Molinillo y Velasco alkateak agindu zuen dorrearen irekiera 1592an eta orain klimatizazio-sistema jarri zaio (aerotermia-euskarriarekin), irisgarritasuna hobetu, estalkia inpermeabilizatu, eta kea ateratzeko eta sukaldean gasa instalatzeko jarduketak egin dira. Horrez gain igeltserotza, zurgintza, saneamendu, argiztapen eta iturgintza lanak ere egingo dira.
1996an Monumentu Multzo izendapena jaso zuten bi eraikinek, Kultura Ondasun izendatutako Artziniegako Hirigune Historikoaren barruan. Gainera, bi espazioak Artziniegako Hirigune Historikoaren Gune Arkeologikoaren gainean daude.
Leader eta Next Generation
Berpiztu programaren barruan jasoko du diru ekarpena udalerriak. Gogoratu beharra dago Udalaren asmoa zela 800.000 euroko laguntza jasotzea 2022-2023 jardunaldian. Ordea, tokiko erakundeak berak azaldu duenez, enpresa lizitatzailearekin arazoak sortu ziren -obra ez zuela epearen barruan amaitu- eta ezin izan zituzten epeak bete.
Hori dela eta, Udalak bertan behera utzi zuen eskaera, baina dirulaguntza berria eskatu dio Jaurlaritzari 2023-2024 epealdirako. Gauzak hala, aurten erabili beharko ditu 700.000 euro horiek.
Dirulaguntza gehiago eskuratu ditu Udalak. Alde batetik, 100.000 euro inguru jasoko ditu Leader programari esker eta 350.000 euro inguru Next Generation funtsen Pirep programaren bidez.