Naroa Yarritu artziniegarrak orain arteko marka pertsonal onena lortu zuen atzo Berangon lehiatutako Euskal Herriko Ingude Txapelketan. Horri esker, hirugarren postua eskuratu zuen eta altxaketa bakarragatik gainditu zuen bigarren sailkatuak. Hain zuzen, Yarrituk 88 aldiz altxatu zuen ingudea minutu eta erdian eta bigarrenak 89 alditan. Irabazleak ia 100 aldiz egin zuen.
Artziniegarra iazko marka hobetu du, 82 altxaketara heldu baitzen. Hirugarren postuak poztasuna sortu dion arren, Yarrituk adierazi dio Aiaraldea Komunikabideari parte hartzaileen artean gazteena izan zela eta hobetzeko tartea duela oraindik: "Hurrengo urtean 90 altxaketa lortzea nahi dut".
Herri kirolariak ez du aparteko ospakizunik egin eta, gainera, aste honetan Arabako Txapelketan lehiatuko da Gasteizen. Iaz bigarren izan zen herrialdean eta aurten ez dio helbururik jarri bere buruari.
Hiru urtez ingudea altxatzen
Duela laupabost urte hasi zen Naroa Yarritu Bizindar herri kirol taldean parte hartzen eta duela hiru proposatu zioten ingudea hartzea: "Modu mixtoan aritzen gara, diziplina bakoitzean neska eta mutil bana lehiatzen dira. Duela hiru urte ingudean aritzen zenaren tokia hartu nuen eta aurrera jarraitu dut".
Yarrituk mezua zabaldu nahi izan du aiaraldearren artean, anima daitezen Bizindar taldean parte hartzen: "Ea beste herrietako jendea ere gurekin entrenatzera etortzen den".