Sutea piztu da Artziniegako Maristen Eskolan. Gaueko 01:50ean jaso dute abisua larrialdi zerbitzuek, Laudioko eta Langraitzeko suhiltzaile parkeetako suhiltzaileak izan dira sugarrak itzaltzeko lanetan. Itzaltze-lanetan ari zen suhiltzaile bat ospitalera eraman behar izan dute eraikineko teilatu zati bat gainera erori zaiolako.
Sugarrak piztu direnean ez zegoen inor eraikinaren barruan. Ertzaintzaren prentsa bulegotik Aiaraldea Komunikabideari azaldu diotenez, sua guztiz itzaltzea lortu dute honezkero, baina goizean zehar suhiltzaile talde bat ingurua ikuskatzera bueltatuko da.
Incendio de edificio en Artziniega. Parques de Laudio y Nanclares trabajando. pic.twitter.com/7H7J1DehKk
— Arabako Foru Suhiltzaileak (@BomberosAraba) October 13, 2023
Eraikina hutsik
2014tik dago hutsik Artziniegako Maristen ikastetxea izandakoa. Historia luzea du eraikinak; 1747. urtetik aurrera Aiarako kontzejuetako bilkuretarako baliatu zen, 1845. urtean enkantean saldu zen arte. Artziniegako Udalak eskuratu zuen, Lantenoko bizilagun baten maileguari esker. Ondoren, 1857. urtean, Eugenio de Garay y Rivacobak erosi zuen, 13.500 errealen truke. Ordutik aurrera hasi zen eraikina eskola moduan erabiltzen, 1990ra arte. Ondoren, elkarbizitza zentro bilakatu zen, 2014ra arte. Urte horretan itxi zituen ateak, eta hutsik dago geroztik.
Maristen ikastetxea zen bitartean, 1961ean hain zuzen ere, haurren aurkako sexu-abusu kasu bat egon zen bertan, El Pais egunkariak argitara atera zuenez. Maristek ikerketa kanonikoa abiatu zuten, ordenaren barruan gertatutako kasuak argitzeko.