Gutuna bidali diote Artziniega eta Aiarako alkateek Gordexolako Udalari, “Bizkaia zeharkatzen duen BI-2604 errepideko konkorrak kentzen hasteko dituzten planei buruzko informazioa” eskatzeko. Joseba Vivancok eta Pruden Otegik uste dute prozesua ezin dela gehiago atzeratu, eta badela garaia udal horrek “badenak pixkanaka ezabatzeari” ekin diezaion.
Bi gobernuburuek nabarmendu dutenez, Bizkaiko Foru Aldundiak bere garaian idatzitako planaren hiru faseak beteta daude dagoeneko. Horregatik, “azken urteetan hartutako konpromisoak betetzea” eskatu diote Gordexolako Udalari.
Vivancok eta Otegik gogorarazi dutenez, 2008an hasi zen arazoa: “Gordexolako Udalak, Bizkaiko Foru Aldundiak 2005ean errepide zatiaren titulartasuna laga ondoren, erabaki zuen badenak ipintzen hastea, 19 guztira, eta ordutik ia bere horretan jarraitzen dute”. Gainera, salatu dute tokiko erakundeak beste konkor bat jarri berri duela, “eta horrek dagoeneko eragin ditu errepide hori Bizkaira eta, bereziki, Bilbo Handira joateko erabiltzen duten askoren lehen kritikak”.
19 konkor jarri ditu Gordexolako Udalak azken hamarkadan, eta berri bat gehitu du azken egunetan, bi alkateek salatu dutenez.
Bi alkateek nabarmendu dute 2008tik hona herritarren protesta ugari egon direla konkorren aurka, eta baita salaketa judizial bat ere. Horrez gain, aipatu dute Eusko Jaurlaritzak 100.000 euroko diru-laguntza eman ziola Aiaraldera itsatsita dagoen udalerriari, konkorrak ezaba zitzan.
Gertakari segida luzea ekarri du gaiak azken hamarkadan, bi alkateen aburuz: “Arabako Foru Aldundiaren bitartekaritza, Bizkaiko Batzar Nagusietarako interpelazioak, bilerak Gordexolako Udalarekin berarekin, anbulantzien eta larrialdien sektoreko txostenak elementu horiek zalantzan jartzeko, hedabideetan oihartzun handia izan duten kanpaina publikoak (Mateo Lafragua Artziniegako bizilaguna buru zuena, adibidez)... Baina Gordexolako Udalak ez du bere jarrera pixka bat mugitu urte hauetan".
Ildo horretan, Vivanco eta Otegik ohartarazi dute abiadura murrizteko elementu horiek “kalte nabarmena” egiten dietela bertatik igaro behar diren gidari eta txirrindulariei. Baina badaude arrisku handiagoak pairatzen dituztenak ere: “anbulantzian Bilbora eraman behar dituztenen osasuna eta bizitza ere arriskuan jartzen jarraitzen dute, eta gaur egun, 20 konkor zeharkatzen dituzte. Arrisku hori, oso salatua izan den arren, duela hamabost urte baino gehiago zegoen bezain indarrean dago oraindik”.
