Artziniegako Udalak prest dauka zirriborroa etxeko animalien babeserako eta ongizaterako ordenantzari dagokionez. Berez, EUDELen (Euskadiko Udalen Elkartearen) eredua baliatu du tokiko erakundeak. Hala ere, parte hartze prozesua burutu dute eta herritarren iritziak eta ekarpenak jasotzeko epea izan dute.
Ordenantza hori garrantzitsua izango da, Espainiako Kongresuak onartutako legeari jarraiki, etxeko animalien bizi baldintzak eta jabeen betebeharrak ezartzen baititu. Adibidez, animali bat beste pertsona bati emateko baldintzak, dagozkion tratamendu medikuak, garraiatzeko beharrezko neurriak... zehazten diru araudiak, isunak ere planteatuta.
Finean, arau-hauste arinak, larriak eta oso larriak definitzen ditu dokumentuak. Arinen kasuan 100 euro eta 3.000 euroko zigorrak jaso daitezke. Gertakari larrietan 3.001 eta 10.000 euro bitartekoak dira zigorrak eta kasu oso larrietan 10.001 eurotik 100.000 eurora heldu daiteke diru-kopurua.
Aldaketak eta egokitzapenak
Udalak zenbait moldaketa txertatu ditu ordenantzan, udalerriaren ezaugarriak eta artziniegarren eskaerak aintzat hartuta.
Nabarmen erreparatu diote elkarbizitzari. Ez dute onartuko 22:00etatik 07:00ak arte animaliak izatea balkoietan, patioetan, terrazetan edota komunitate lorategietan. Espazio publikoan dauden elementuetan lotzea ere debekatuko du testuak.
Animalien aisialdirako eremua
Maskoten aisialdiari dagokionez, Artziniegako Udalak Arteako gunea proposatu du animalien erabilerarako. Horrela izango da urritik apirilera bitartean, baina gainerako hilabeteetan lotuta egon beharko dira txakurrak, inguruan bere jabea ez den norbait badabil.
Halaber, aipatu beharra dago udal eraikinetan ez dela baimenduta egongo animaliak sartzea.