Artziniegako Udalak jakinarazi du fatxada eta horma-irudien bigarren lehiaketa deitu duela. Hemen topatu daitezke oinarriak.
Tokiko erakundeak iragarri du 5.000 euroko saria izango duela epaimahaiak hautatzen duen diseinuak eta Pablo Respaldizaren sutegiaren alboan dagoen eraikinean margotuko dutela.
Berez, sutegian egiten zen lana balioan jarri nahi dute eta kontzeptu hori hartuko dute bereziki aintzat. Horregatik, interesdunek aukera izango dute tokia bisitatzeko igandetan 10:00etatik 14:00ak arte.
Hain zuzen, Pablo Respaldizaren sutegia Artziniegan XX. mendearen bigarren herenera arte jardun zuen azken sutegietako bat da. Hiribilduaren historian jarduera horren aztarnak topatu dituzte dokumentazioan eta horren garrantzia aitortu nahi du erakundeak.
Orokorrean, egitasmoaren helburua da artea hormetan zehar hedatzen jarraitzea eta, modu horretan, "Artziniega erakargarriagoa egitea", Udalaren hitzetan.
Iaz egindako lanari jarraipena emango diote edizio berri honekin. Izan ere, Garai plazako kanpandorrean margotu zuten Txerra Ortega sortzaile madrildarraren diseinua.