Ibilbide luzeko arazoa bilakatu da Artziniegan paperaren eta kartoiaren edukiontzietan hondakinak pilatzearena, material horien jasoketa behin eta berriz atzeratu baitute bilketa enpresako arduradunek.
Egoera “jasanezina” bilakatzen ari zela adierazi zuen Udalak udan. Uztailaren 16an jakinarazi zuen Aldundiak ordura arte lan hori egitea zegokion Daorje enpresak zerbitzua emateari utziko ziola, eta hainbat zigor espediente ireki dizkiola zerbitzua behar bezala ez emateagatik. Garbialdi enpresa da, geroztik, zerbitzua ematearen arduraduna.
Arkaitz San Jose zinegotziak Azalera podcastean azaldu duenez, enpresa aldaketarekin batera, aurretik zeuden arazoak konpontzeko bidean egon beharko lukete, baina egoera bestelakoa da: “Guk ikusten duguna eta jendeak plazaratzen duena da zerbitzuak berdintsu jarraitzen duela, nahiz eta enpresa aldatu”.
Egoera ikusita, Artziniegako Udalak Aldundiari eskatu dio gaiaren gainean egotea, "bere konpetentzia baita”. Batzar Orokorretan ere adierazi dute zerbitzuaren egoera, herrian behintzat, ez dela duina.
Artziniegako herritarrak gaiarekin nahiko arduratuta daudela azaldu zuen San Josek, eta hori dela eta erabaki dute foru erakundeetan kezka hori helaraztea.