Artziniegako Talde Feminista kalera atera zen igandean herrian jazotako eraso matxista baten ondorioz. Kasu honetan, ezin da esan zehazki berria izan dela, antza denez, aspaldi gertatu baitzen. Ordea, indarkeria jaso zuen emakumezkoak azaroaren hasieran adierazi zion Udalari lehenengo aldiz eta tokiko erakundeak zabaldu zuen gertakaria.
Artziniegako Talde Feminista geroago jarri zen emakumearekin harremanetan eta babesa emateko, elkarretaratzea egiteko aukera aipatu zioten. Bere oniritzia jaso ondoren, igandean bertan ekin zioten mobilizazioa egiteari. Hiriko Atean izan zen hitzordua 12:45ean, lorategi feministaren alboan.
Berez, tokiko taldeak beste kontzentrazio bat deitu behar izan zuen duela hilabete baino gutxiago, beste bortizkeria kasu baten harira.
Udalak zein herriko mugimendu feministak azpimarratu dute inoiz ez dela berandu eraso matxista baten berri emateko eta gogoratu dute zein tresna eta bide dauden horretarako:
- Aiarako Kuadrillako berdintasun teknikaria: 686 587 889
- Aiarako Kuadrillako Gizarte langilea: 681 084 118
- Sexu indarkeria biktimentzako 24 orduko krisi zentroa (TXIMELETAK): 650 801 080
- SATEVI: 900 840 111.
- Gizarte Larrialdietarako Zerbitzua: 945 161 210
Argazkiak: Artziniegako Talde Feminista