Errolda sozialaren aktibazioa izan du hizpide Arkaitz San Josek Aiaraldea Komunikabidearen Azalera podcastean. Zinegotziaren aburuz, neurri hori "helduleku" bat da "egoera zaurgarrian bizi diren pertsonei" laguntzeko, "erroldatik abiatzen direlako beste babes sozialerako balio duten beste zerbitzuak".
"Eskualdeko egitasmo bat bezala" ulertzen du San Josek Laudioko Udalarekin batera aktibatutako protokoloa. Bere hitzetan, kale egoeran edo infraetxeetan dauden pertsonen presentzia murritzagoa da Artziniegan, Renferekin konexioa duten beste herri batzuekin alderatuta. Gaur gaurkoz, berak ez du egoera horretan dagoen bizilagunik ezagutzen herrian, baina jakinarazi du egon direla kasuak iragan hurbilean, eta "prest" egon behar direla horrelakoetan "babesa" emateko. "Gu saiatzen gara eurengana hurbiltzen eta babesa eskaintzen, gure langileen lanari esker, eta errolda soziala beste neurri bat da bide horretan", azaldu du.
Horrelako egoerei aurre egiteko baliabide gutxi dituztela aitortu du San Josek, Artziniegan ez dagoelako egoera zaugarrian dauden pertsonak artatzeko etxebizitza publikorik. Hala ere, garrantzitsutzat jo du horrelako neurriak ezartzen joatea, "gutxieneko zerbitzuetara sarbidea izateko behintzat".