Herriko etxebizitza-egoerari eta hiri-plangintzari lotutako hainbat gai baloratu ditu Artziniegako EAJk, osteguneko osoko bilkuraren ostean. Udalak Valle Etxea eraikina etxebizitza sozialera bideratzeko erostea begi onez ikusi dute jeltzaleek, baina "udal-estrategia arinagoa, egiturazkoagoa eta koordinatuagoa" eskatu dute.
Arabako Foru Aldundiaren Araba(n) Bizi Bedi programaren finantzaketari esker gehituko da Valle Etxea etxebizitza parke publikora, 356.250 euroko dirulaguntza eskuratu baita. Alokairu sozialeko zortzi etxebizitza sortuko dituzte bertan. Encina Castresanak gogorarazi du bere alderdiak eskatu ziola EH Bilduren gobernu taldeari laguntza-lerro hori ez galtzeko.
Jeltzaleen iritziz, Valle Etxearen erosketa urrats positiboa bada ere, ez du estaltzen azken urteotan etxebizitza sustapen berrien faltak sortutako gabezia. Alderdiak azpimarratu du egoera horrek eragin zuzena izan duela herritarren artean, bereziki gazteek etxebizitza eskuratzeko dituzten aukeretan. "Egiturazko beharraz ari gara, eta ez da jarduera isolatuekin konpontzen. Artziniegan denbora oso baliotsua galdu da etxebizitza publikoaren arloan, eta horrek ondorio zuzenak ditu gazteak etxe batean sartzeko orduan", adierazi du Castresanak.