Aiaraldeko Euskalgintza Kontseiluaren proposamenarekin bat egin dute Amurrioko txosnaguneko txosna guztiek eta parketik at jarriko diren lau txosnetatik hiruk. Mendiko Lagunak, Gazte karpa, Etxerat, Amurrioko Eragileen txosna, Kuxkumendi mendi bizikleta taldearen txosna eta plazan kokatuko den Ezina Ekinez Egina elkartearen elkartasun txosnek hartu dituzte euskararen normalkuntza bultzatzeko konpromisoak. Abiapuntua txanda guztietan arretan gutxienez pertsona euskaldun bat izatea bermatzea izango da, informazioa guztia euskaraz izatea eta bozgorailuetatik jartzen den musikaren erdia baino gehiago euskaraz izatea.
Oinarri horretatik aurrera Txosnetarako Hizkuntza Irizpideak eta Praktika Onen Gida jarraitzea proposatzen du Aiaraldeko Euskalgintza Kontseiluak. Bertan eragile ezberdinek gomendio praktiko eta zehatzak aurkituko dituzte beren jarduna euskararen normalkuntzaren bidean joan dadin.
Gora Aiaraldeko Jai Euskaldunak
Eskualdeko jaietan euskara bultzatzeko kanpaina presente izango da Amurrion aipatutako neurriez gain kartel eta pegatekin. Baita, Amurrioko 12 tabernek hartutako konpromisoekin. Ezin ahaztu, Jai Herrikoien Mugimenduak, azken urtetan legez, bat egin duela ekimenarekin eta Euskararen Semaforoa darabilela.
Dinamikan parte hartzeko proposamena herriko txosna guztiei helarazi die Aiaraldeko Euskalgintza Kontseiluak. Aurten bi eragilek jarri dute txosna lehendabizikoz: Ezina Ekinez Egina eta Kuxkumendi BT taldeek. Biek baiezkoa eman diote euskalgintzaren proposamenari. Txosnaguneak azken urtetan legez bat etorri da baita. Gainera aurten, Eragileen Txosna ere izango da bertan aurrenekoz. Horretan parte hartzen dute Kuadrillek, Amurrio Harrok, SOS Aiaraldeak, Amurrioko Emakumeen Sareak, Amurrioko Musikazale Elkarteak eta AIEKEk. Beraz, salbuespen bakarrarekin, herriko txosnek bat egin dute proposamenarekin.