Abuztuaren 15ean Laudio jaietan murgilduko da eta euskararen biziberritzeari ekarpena egiteko, konpromisoak hartu dituzte ostalari laudiarrek. Hizkuntza paisaia, musika eta arreta kontuan hartzen dituen konpromisoak eskatu ditu Aiaraldeko Euskalgintza Kontseiluak, eskualdean aurrera daraman kanpainaren baitan.
Konpromisoak
Tabernako idatzizko elementuak euskaraz izatea eta gutxienez musikaren erdia euskarazkoa izateko konpromisoa hartu dute Gorka eta Donde Yuri tabernek. Bi konpromiso hauek betetzearekin batera, arreta euskaraz izateko gutxienez tabernarien erdia euskalduna edo txanda bakoitzean tabernari euskaldun bat bermatuko dutela hitz eman dute Ederki, Iluntze, Kaia, Haitzulo, Ilargi, Bengoa eta El Lio tabernek. Keska tabernan berriz zerbitzua eta idatzizko elementuak euskaraz izango dira.
Ostalari hauek emandako pausua txalotu nahi du Aiaraldeko Euskalgintza Kontseiluak. Horrekin batera, herritarrak kontsumitzerakoan, konpromisoak hartzen dituzten tabernen aldeko hautua egitera deitzen ditugu.
Eskualde osoan
Kanpaina udalerri guztietako jaietan aurrera eramango du Aiaraldeko Euskalgintza Kontseiluak. Ekimena jada gauzatu da Urduñako Otxomaiotan , Aiarako Jaietan, Ugarte eta Aretako jaietan eta Amurrioko jaietan.