16 ikastetxe, 7 haurreskola, 8 udalerri… 0-5 urte bitarteko haurrak dituzten familien baitan euskara bultzatzeko ekimena da Gurasoleku. Duela sei urte sortua, irailarekin batera bueltan da, oraingoan zenbait berrikuntzarekin.
Irakasleentzako saioak eta familientzako saioak eta baliabideak eskaintzen ditu Gurasolekuk. Kontzientziak piztu, estrategiak erakutsi, tresnak eskura eman… xedea haurren lehen etapatik etxean euskararen transmisioa bultzatzea da. Izan ere, ikastetxeek bakarrik ezin dute umeen euskalduntzea bermatu, beraz familien inplikazioa ezin bestekoa da, familia euskalduna izan edo ez. Horrek, inplikatzeak, markatuko du diferentzia, euskara menperatu gabe eskola ibilbidea ezin baitaiteke arrakastaz burutu.
Berrikuntzak
Esku-orri baten bidez familia guztiei euskara ikasteko edo euskarara hurbilketa egiteko eskualdean dagoen eskaintza guztiaren berri emango zaie aurten: euskaltegiak, udal zerbitzuak, HHIak, elkarteak… Horrela familia bakoitza bere egoeraren arabera pausuak emateko aukera izan dezan.
Euskararen Erreminta kutxa euskaraz online dauden baliabideen gida bat da. 75 debaldeko tresna baino gehiago eskaintzen ditu eta sarbiderako QR bat dakar esku-orria.
Euskara praktikatzeko eskualdean dauden berbalagun taldeen berri jasotzeko etengabe berrituko den web-orrialdera sarbidea eskaintzen du esku-orriak baita.
Azkenik familian gozatzeko aisialdiaren berri jasotzeko whats-app kanal bat sortu du Aiaraldeko Euskalgintza Kontseiluak. Euskararen transmisioa bultzatzeko bideoak eta poltsiko hiztegietara sarbidea eskaintzen du baita esku-orriak.