Azken asteotan ahoz aho dabilen gaia da 60 ikaslek selektibitateko euskara azterketan ateratako zeroa. Zalantzarik gabe, larritzeko gertakaria da, baina are okerragoa izan da ondoren gertatutakoa.
Hasteko, zeroa atera zuten ikasleek, zein hauei babesa adierazi nahi zietenek, egoeraren aurka protestatzeko kontzentrazioa antolatu zuten Bilboko Ingeniaritza Eskolaren atean. Ikasle batzuek hedabideen aurrean adierazpenak egin zituzten eta argi geratu zen ez zirela esaldi bat bera ere zuzen formulatzeko gai. Izan ere, zeroa atera duten ikasle guztiak A eredukoak dira. Honen bidez, A eredua ikasleek menderatu beharko luketen euskara maila bermatzeko gai ez dela ikusi da.
Hala ere, kontua ez da horrela geratu. Sistemaren porrota agerian utzita, nota hauek atera dituzten ikasleek eta haien familiek auzitara jo dute. Azken egunotan, auzitegiek ikasle hauen euskarako nota kontuan ez hartzea eta batezbestekoa euskarako nota gabe egitea erabaki dute.
Egoera hau guztiz lotsagarria eta onartezina da. Euskara eta euskaldunok bigarren planoan uzteaz gainera, erabaki politiko interesatu bat hartzen ari da epaitegia; euskara gehiago zapaltzea. Zalantzarik gabe, hau euskararen aurkako oldarraldiaren barruko beste erabaki bat da.
Lehenik eta behin, Euskal Herriko hezkuntza sistemak euskara izan behar du ardatz, euskalduna eta publikoa izan dadin.
Hortik harago, inoiz baino argiago ikus daiteke, euskarak eta Euskal Herriak independentzia behar dutela. Eta ikasleon euskalduntzea gure estatuaren eta hezkuntza sistema propio, publiko eta komunitarioaren eskutik soilik etorriko dela.
Euskal ikasleok urteak daramatzagu egoera honekin lotura zuzena duten aldarriak plazaratzen. Hala egin genuen iragan abenduaren 11ko ikasle greban, “Gure hezkuntza euskalduna” lelopean ikasgelak hustu eta kaleak bete genituenean, eta hala egiten jarraituko dugu euskaldunon aurkako eraso berri bakoitzean.
Zeroa sistemarena da.
Euskaldunon aurkako erasorik ez. Hezkuntza euskalduna!