Aurreko legegintzaldian hainbat funts ekonomiko lortu ziren Laudio Udaleko gobernu taldearen eta udal langileen lanari esker. Eusko Jaurlaritza, Arabako Foru Aldundia, Espainiako Gobernua edota Europako Batasunetik funts ekonomiko ezberdinak lortu ziren, Laudion ezinbestekoak diren inbertsioak egiteko.
Orain dela hilabete batzuk jakin genuen, gaur egungo udal gobernu taldeak 1,8 milioi euroko dirulaguntza bati uko egingo ziola. Dirulaguntza hori, besteak beste, Abasto Plazaren berrikuntzarako bideratuta zegoen. Obra hori ez ezik, beste 13 ekintza ezberdin bideratuko ziren diru horrekin komertzioa berpizteko ahalegina egiteko. Duela aste batzuk, Udalak prentsaren bitartez beste gauza bat jakinarazi zuen, 1,8 milioi euroko dirulaguntza ez zuela itzuliko eta inbertsioari ekingo ziola. Harriduraz hartu genuen berria, baina zergatik norabide aldaketa hori? Zer gertatu da erabakiz aldatzeko? Erabakia hartu baino lehen ezin zitekeen zer edo zer egin?
Udal gobernu taldeak norabidea galduta dauka. Laudiok bat-bateko erabaki aldaketekin garesti ordainduko du. Laudiok pairatzen duen egoerarekin ez dut uste, dirua galtzeko moduan dagoenik. Sei hilabete pasatu dira EH Bilduko eta Omniako udal gobernu taldeak udaletxeko lema hartu zutenetik eta oraindik ez dakigu zein izango den beraien norabidea eta, ondorioz, Laudioren norabidea. Aurreko legegintzaldian lortutako beste funts ekonomikoekin zer gertatuko da? Espero dezagun Laudiorako onuragarriak diren erabakiak hartzea.