Ramiro Gonzalez Arabako ahaldun nagusiak duela minutu batzuk aktibatu du Arabako Lurralde Historikoko Larrialdi Plana (ALHLP), Arabako Foru Aldundiaren BALIABIDEAK Eusko Jaurlaritzak hartzen dituen erabakien esku utziz. Neurri hori Iñigo Urkullu lehendakariak osasun-larrialdiko deklarazioa eta Euskadiko Babes Zibileko
Planaren aktibazioa iragarri ondoren hartu da, eta, horrez gain, dekretu bat sinatu da, larrialdiaren aurrean babes zibileko zuzendaritza bakarra eta erantzunzuzendaritza bere gain hartzen dituena. Une horretatik aurrera, Lehendakariak zuzendaritza hori hartuko du bere gain, aholku-batzorde batek lagunduta.
"Lehendakariak jakinarazitako erabakiaren ostean eta harekin koordinatuta hartu dut erabaki hori, gauden egoeraren aurrean erantzun koordinatua eta eraginkorra eskaintzeko asmoz", azaldu du ahaldun nagusiak.
ALHLP-k gertakari, istripu, hondamendi edo lazeria publikoren bat gertatuz gero pertsonak eta ondasunak babesteko beharrezkoak diren esparru organikofuntzionala eta baliabideak mobilizatzeko mekanismoak definitzen ditu, baita esku hartzen duten beste erakunde publiko eta/edo pribatu batzuekin koordinatzeko modua ere. Era berean, gertakari, istripu, hondamendi edo lazeria publikoak gertatzeko probabilitatea murrizteko prebentzio-planak egitea ere sartzen da, esklusiboki edo beste erakunde publiko edo pribatu batzuekin lankidetzan.
ALHLP-ren helburua arrisku larriko egoerei aurre egitea da, bai egunerokoak, bai lazgarriak ez direnak, bai hondamendi edo zorigaitz publikoak, bere lurralde-eremuan gerta daitezkeenak, eta dagokion antolaketa-esparrua ezartzea.