Kartzela, gai bezala, uste dut niri bezain gutxi gustatzen zaiola edonori. Baina proposamen polita bota didate ARGIAko langileek oraingoan honen inguruan. Harpidetzen kontuan murgilduta gabiltzala, errepasoa han eta hemen, oroitu gara badirela zenbait helbide tamalez ezagunak zaizkigunak. Kartzelak. Eta orduantxe piztu bonbilla. Zergatik ez ezagutu ARGIA kartzelako begietatik?
Galdera asko datozkit burura horrelakoetan, eta batzuk ziurrenik kartzela bizi gabe inoiz ez ditut erantzungo. Adibidez, zer esan nahi du zure herritik milaka kilometrora zaudenean euskal prentsa jasotzeak? Eta hori da bizi izan ez duen batek ulertzeko zaila seguruenik. Baina horixe galdetu diot Jon Mintegiagari. Preso politiko ohia bera, kartzelan zela ARGIAko harpidedun egin zen (zuten). Lehen erantzuna izan da lasai irakurtzeko artikuluak direla, erreportaje sakonagoak irakurtzeko aukera ematen ziola... Baina jarraitu du euskara aberatsa duen testuak dituela eta kartzelan, ia euskaldunik gabe zegoela, nolabaiteko arnasgune izaten zela berarentzat. Euskal Herriarekin ia prentsa idatzi bidez mantentzen da harremana.
Blog bat ere ireki zuen argia.eus-en, eta “barrutik presoen kolektiboari egindako ekarpena” izan zela definitzen du berak, lagundu nahi izan baitzuen erakusten euskal preso politikoen kartzelako egunerokotasuna, bizipenak.
Bada beste harpidedun bat Zurich-en. Nekane Txapartegi. Hilabete gutxi batzuk dira harpidedun egin zela, eta bere lagun batek kontatzen digu zein emozionatuta dagoen, hamalau urtez euskal prentsarik irakurri gabe egon ondoren, ARGIA edo Berria bezalakoak jasotzen dituenetik. Euskal Herriarekin berriz konektatu duela dio, eta definitzen du ARGIA momentu honetan dagoenaren alternatiba komunikatibo bezala.
Badira etxean harpidedun egin eta hileroko paketeetan astekariak sartzen dizkietenak ere. Mikel Orbegozo, adibidez. Marrazkilaria bera, ziur artikulu batek baino gehiagok inspiratu duela edo eman diola informazioa. Amak hala dio.
Eta hauek adibideak bakarrik dira, harpidedun preso gehiago ere badaude; baina lerro gutxi hauetan denak aipatu ezin. Moduak asko dira presoengana iristeko, eta ekonomia behintzat ez dadila oztopo izan. ARGIA irakurri nahi duen orok du aukera horretarako.
LAGUN AGURGARRIA:
Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.
Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.
Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.
Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.
Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.
Faktoria izan, egin zaitez bazkide.
Aiaraldea Hedabideko lantaldea.
Izan bazkide