Izan Amurrio-Apymca merkatari eta ostalari elkarteak marketplace digital bat jarri du abian Amurrioko Udalarekin eta Rural Kutxarekin elkarlanean. Somos tu comercio Amurrio lemapean, guztira Amurrioko 37 establezimenduk osatzen dute plataforma digitalaren eskaintza, eta egitasmoaren sustatzaileek azaldu dutenez "proiektu bizia da, datozen hilabeteetan establezimendu gehiago erakartzeko ilusioa duena".
Plataforma digitala
Orotariko aukerak eskaintzen ditu marketplace digitalak, bai merkatarientzako, baita bezeroarentzako ere. Plataforman komertzioek ikusgarritasuna izan dezakete edota zuzenean euren produktuak saldu. Bezeroarentzako aukerak ere biderkatzen dira: produktua etxean jaso dezake edota dendan eskuratu eta bertan ordaindu.
Ordainketak egiteko ere hainbat modu eskainiko dituzte: transferentziak, txartel bidezko ordainketak, PayPal, eskuz ordaintzea eta aurki Bizum bidezko ordainketak ere. "Oso herreminta intuitiboa da, eta komertzioei formakuntza pertsonalizatua eskaini zaie tresna abian jarri aurretik" adierazi dute Izan Amurrioko ordezkariek.
Klik batean
Amurrioko komertzioek eskaintzen dituzten zerbitzuen hobekuntza da marketplace-aren xede nagusia, bezeroen erosketa esperientzia hobetuz.
"Gure helburua bezeroak nahi duena nahi duenean erostea da, baina gure betiko komertzioan, izan denda fisikoan edo internet bidez" adierazi zuten plataformaren aurkezpenean.