Aurreko urteetan bezala, piper erreak saltzeari ekin diote aurten ere Laudioko Agrolaudio dendan. Leivako (Errioxa) piperrak dira Gardeako pabiloian saltzen dituztenak. Egunero doaz piperren bila bertara. "Enkarguak egun batetik bestera hartzen ditugu. Egunean bertan moztutako piper freskoak dira hemen saltzen ditugunak, eta bezeroak ziurtasun hori dauka" azaldu dute Agrolaudioko arduradunek.
"Jendea oso pozik dago, badakielako produktu fresko bat ari dela erosten. Goizeko 8:00etan mozten dituzte piperrak Leivan eta eguerdirako dendan ditugu"
Bi piper barietate erre eta potetan sartzen dituzte: Najeranoak eta pikillo piperrak. Gardean bertan erretzen dituzte piperrak, egunean bertan bildutakoak. Irailaren 3an hasi zuten kanpaina eta azaro hasieran bukatuko dute.
Agrolaudioko kideak oso pozik daude herritarrek erakutsitako jarrerarekin: "Duela hiru urte ekin genion piper erreak saltzeari. Jendea oso pozik dago badakielako produktu fresko bat ari dela erosten. 8:00etan mozten dituzte piperrak Leivan eta eguerdirako dendan ditugu".
