50 urte igaro dira Laudio Ikastolak lehen promozioari ateak zabaldu zizkionetik. Geroztik, ehunka ikasle igaro dira bertatik, Haur Hezkuntzatik Batxilergora arteko eskolatzea bertan garatuz. Hain zuzen ere, ikastetxe berdinean 18 urte arteko eskolatze integral bat jasotzeko aukera nabarmendu dute Miren Urquijok eta Arkaitz Gastakak, Ikastolako Haur Hezkuntzako ikasle batzuen gurasoek: “Argi izan genuen lehenengo momentutik. Beste eskoletan ez dago aukera 18 urte arte egoteko eta horrek ere garrantzia zeukan guretzako”.
Irantzu Albinarratek eta Urko Belaskok ere seme-alabak Ikastolako Haur Hezkuntzan matrikulatzearen alde egin dute. Ikasle ohiak dira biak, eta hasieratik izan dute argi erabakia: “Guretzat oso garrantzitsua zen euskara eta euskal kultura sustatu eta bermatzen zuen ikastetxe batean heztea umeak eta baita hezkuntza eredu aurrerakoi bat bultzatzen duena ere, hainbat baloreetan oinarritutakoa hain zuzen ere: berdintasuna, elkartasuna, elkarlana...”.
Eneritz Ibarretxek eta Jabi Fernandezek ere antzeko irizpidea baliatu dute erabakia hartzerako orduan: "Ikastola aukeratzean oinarri kulturala, hizkuntza, nortasuna eta baloreak lehenetsi ditugu".
Hiru familiek pedagogia berritzaileen garrantzia nabarmendu dute, hala nola: umeen mugimendu askea, espazio berriak, basoa... 50 urte hauetan Ikastola ez da geldirik egon eta etengabeko berrikuntzan murgildu da. Horretarako, irakasleen formakuntza eta azpiegitura egokien beharra ezinbestekoa dela azpimarratu du Miren Urquijo guraso eta fisioterapeutak, eta Ikastolak hori guztia bermatzen duela uste du. Berrikuntza pedagogikoekin jarraituz espazio naturalen garrantzia aipatu du Irantzu Albinarratek. Horren adibide dira Haur Hezkuntzako ikasleentzat atondutako baratza eta basoa espazioak non naturarekin harremanduz ikasketa prozesuan aurrera egiten duten haurrek.
Laudio Ikastola 50. urtebetetzeko ospakizunen antolakuntzan dabil buru-belarri. Ikasle ohiak eta etorkizuneko ikasleak izango dira ospakizuneko protagonistak. Irantzu Albinarrate eta Urko Belasko ikasle ziren Ikastolak 25 urte bete zituenean eta, aurten, guraso bezala biziko dute 50. urteurrena, Miren Urquijok eta Arkaitz Gastakak bezala. Asko dira urte luzez pilatutako oroitzapenak: Aratusteetako mozorroak, Gabonetako dantzaldiak, Olentzero eta Mari Domingiren etorrera, ikasbidairako dirua biltzeko egindako lanak...
