Orozkon finkatutako enpresa familiarra da Torresar, zur nobleak zerratzen espezialista. Egungoa, duela 70 urte baino gehiago lantegia zabaldu zuen familia beraren laugarren belaunaldia da.
Torresarrek 1947an ekin zion bideari, Pagomakurreko tailer txiki batean. Handik zortzi urtera, 1955ean, Orozkoko Torrezar auzoan finkatu zen, eta bertan jarraitzen du gaur egun ere.
Zuraren zerraketa izan da enpresaren eginkizun nagusia urte luzez; upelak edota habeak egiteko egurra landuz, besteak beste. Denboraren poderioz, eta garaiek hala eskatuta, negozioa dibertsifikatzen joan dira eta asko dira gaur egun Torresarren berezitasunak: paketatzea, biomasaren ekoizpena, zuraren lehortzea… Erregai ekologikoen aldeko apustuan berretsiz, zerrauts eta egurrezko-txirbilekin sortutako pelleta ekoizten dute ere, etxeetako berogailuetan erabiltzeko.
Eguzki-plaka berriak
Energia berriztagarrien beharrizanaz jakitun, urrats berri bat eman du Torresarrek. Ingurugiroa zaindu eta behar ekonomikoei erantzuteko plaka fotoboltaikoak jarri dituzte enpresaren azpiegituran. Instalazio-elektrikoetan aditua den Tecoel enpresa arduratu da lan horiek egiteaz.
Guztira 238 eguzki plaka dira Torresarreko teilatutik fabrika osoa hornitzen dutenak, eta 100kW-ko potentzia eskaintzen dute. Torresarreko arduradunek azaldu dutenez, instalazio berriak fabrikaren energia-autokontsumo tasa %60an kokatzen dute, eta soberakin energetikoak egonez gero sare-elektrikora igortzen dute. “Gure lan egiteko modu familiarrean aurrerapauso berria da honakoa”, adierazi dute Torresarreko kideek. “Eguzki-plaka berri hauekin eskualdeko baliabideak optimizatzeko apustuan berresten gara. Tokikoari lehentasuna eman diogu beti Torresarren, bai lantzen ditugun materialen aldetik, baita gurekin jardunean dauden langileen aldetik ere”.
