Zer helbururekin antolatu duzue biharko azoka?
Badaude enpresa batzuk lan-indar bila daudenak eta langilerik ez dagoela diotenak. Aldi berean, langabezia izaten jarraitzen dugu eskualdean, 45 urtetik gorakoen artean eta pertsona migranteen profil batzuen artean bereziki.
Horregatik, ekimenaren helburua da jende hori profesional bila dauden enpresekin hartu-emanean jartzea, badakigulako batzuetan ez dela erraza bi aldeen arteko komunikazioa. Enpresek bilatzen dituzten profilak jendearen artean bilatzen saiatu nahi dugu, match egin dezaten. Modu horretan, azoka eraginkorra izatea dugu helburu.
Profil zehatzen bila zaudete?
Profil askoren bila daude enpresak. Gehienak industria esparrukoak dira, baina badugu baita zerbitzuen sektorekoren bat ere. Baina bai, biharko azokan parte hartuko duten gehienak industria profilekoak dira: elektrikariak, soldatzaileak, mekanikariak...
"Jendea jubilatuko da eta profil berriak bilatu beharko ditugu horregatik"
Azaroan egin genuen galdetegian enpresetatik sortu zen kezka nagusia zen hori, ez zutela profesionalik topatzen hutsik dituzten lanpostu batzuk betetzeko. Horregatik, helburua bada enpresek profil horiek topatu ahal izatea, modu eraginkorrean ekoizten jarraitu ahal izateko.
Azokaren lehen edizioa da aurtengo. Bigarrenik egongo da?
Hori da asmoa, enpresen beharrak urtez urte joango direlako azaleratzen. Jendea jubilatuko da eta profil berriak bilatu beharko ditugu horregatik.
Nabarmenduko nuke baita ere azoka hau Vital fundazioarekin eta eskualdeko beste agente ekonomiko batzuekin elkarlanean antolatu dugula. Azokara joango den jendea esparru ezberdinetan formatutakoa da: logistikaren esparruan, fabrikazio mekanikoan edota adimen artifizialean. Badira enplegua bilatzen ari diren pertsonak, baina uneoro ari dira euren buruak formatzen eta birziklatzen. Aiaraldea Lanean-en ikastaro bat jarri dugu martxan adimen artifizilaren inguruan, 80 ordukoa, hau ere Vital Fundazioarekin elkarlanean. Sartuk, bere aldetik, logistika formazioak eskaini ditu... garrantzitsua da eskaintzen ditugun ikastaroak enpresek bilatzen dituzten profiletara egokituak egotea.