Etapen arteko elkarrekintza dute ardatz Laudio Ikastolan, Haur Hezkuntzatik hasi eta Batxilergoraino ikasleen garapen integralerako hezkuntza-ibilbide osatu bat eskainiz. Belaunaldien arteko zubi horren adibide da DBHko eta Haur Hezkuntzako ikasleen artean sortutako elkarlana: DBHko ikasleek teknologia ikasgaian garatutako proiektua Mari Domingi eta Olentzeroren opari gisa jaso dute Haur Hezkuntzako ikasleek.
Sei urte dira dinamika abiatu zutela. “Teknologia irakasgaitik Haur Hezkuntzan zituzten beharrak asetzeko aukera ikusi genuen”, azaldu du Beñat Pagoaga Arrizabalaga irakasleak. Egurrezko material eta jostailuen premia, DBHko ikasleek garatzeko proiektu bilakatu zituzten. “Animaliak, autoak, trenak… Orotariko jostailuak sortu dituzte ikasleek, beti ere Ikastolako txikienen beharrei erantzunez”, azpimarratu du Nagore Atxabal Iturregik, Haur Hezkuntzako ikasketa buruak.
Zubiak eraikiz
Hutsetik abiatutako proiektua da tekonologia irakasgaian garatutakoa, eta urratsez urrats jarraitu dituzte jostailu bat diseinatzeko urratsak. “Ikasleak izan dira prozesuaren erdigunea” —nabarmendu du Pagoagak—. “Haur Hezkuntzako ikasleen beharrak ezagutu zituzten aurrena, eta bertan bildutako informazioarekin jostailuaren lehen bozetoak osatu zituzten”.
Aurten 3-4 urteko haurrentzako panpina-etxetxoak eta txikienentzako egurrezko animaliak sortu dituzte Pagoagaren ikasleek. Horretarako kontuan hartu dituzte erabili beharreko materialak, teknikak edota segurtasun neurriak.
“Oso ekintza motibagarria da, hasieratik”, aldarrikatu du Atxabalek. Ikasleen protagonismoa eta konpromisoa jarri dituzte balioan. Ebaluazioek markatutako denboretatik kanpo kokatu dute proiektua, eta hori ere bada motibaziorako beste arrazoi bat, Pagoagaren hitzetan. “Kalifikazioa bigarren mailako kontua da. Ikasleek abenduko azken asterako jostailuak bukatzeko konpromisoa hartzen dute, Mari Domingik eta Olentzerok jaso ditzaten. Motibazio horrekin egiten dute lan”.
Ikastolako txikienek ere oso gogotsu jasotzen dituzte opariak. Jostailua estreinatzeko unea “magikoa” dela azaldu du Atxabalek: “Oso baliagarriak zaizkigu jostailuak Haur Hezkuntzan. Orain, esaterako, herria eta etxea lantzen ari gara proiektu batean, eta oso aproposa da DBHko ikasleek egindako panpina-etxeak eskura izatea”.
