Bideo bat plazaratu du Izan Amurriok, tokiko merkataritzari balioa emateko, “herriko eguneroko bizitzan negozioek duten papera” nabarmenduta. “Establezimenduetatik harago, goizero altxatzen den pertsiana bakoitzaren atzean dauden pertsonak erakutsi nahi izan ditugu, lan egiten duten, ekiten duten, jarduera ekonomikoa sortzen duten eta herria egiten laguntzen duten pertsonak”, azaldu dute.
Modu horretan, “merkataritza Amurrioko nortasunaren eta bizitzaren parte dela” jarri nahi izan dute mahai gainean, eta “eguneroko keinu txikiek” duten garrantzia ere azpimarratu dute. Izan ere, euren iritziz, mota horretako keinuak dira laguntzen dutenak udalerriko “merkataritza eta gizarte-ehuna bizirik mantentzen”.
Era berean, “hurbileko merkataritzari laguntzearen garrantziaz” sentsibilizatu nahi izan dituzte herritarrak, “haien hurbiltasuna, konpromisoa eta herriaren garapen ekonomiko eta sozialari egiten dioten ekarpena balioetsiz”.
Horri erantzuten dio baita bideoaren amaieran agertzen den lemak: “Orain zure txanda da”. Modu horretan, gonbidapen bat luzatu diete herritarrei, “Amurrioko hazkundeari eta bizitasunari laguntzen dion elkar laguntzeko kate horren parte izaten jarraitzeko”.