Urriaren 10etik 29ra bitarte, eskualdeko emakume* erreferenteen lanketan buru-belarri sartu dira Laudioko ehundik gora gazte. Ekimena Bor-bor Aiaraldeko feminismo elkarteak sortu eta garatu du, Arabako Foru Aldundiaren babesari esker.
Alabaina, eskualdeko heziguneen laguntza jaso dute horretarako. Hain zuzen, Laudio BHIko 14 urteko gazteak izan dira hartzaile nagusi, DBH2 ikas mailakoak.
Bi orduko iraupena izan dute saioek, eta jolasen bidez erreferenteen iruditegia zabaltzea eta eskualdeko emakumeen jakintza zein lorpenei aitortza soziala egitea bilatu du Bor-bor elkarteak.
Hiru erronka bete nahi izan dituzte horrela: ”Formatu ludikoetan, bailarako emakume sortzaile, ekoizle edo kirolarien jarduna ezagutzea; esperientzia gozagarri eta bizigarrien bidez feminismora zein euskarara gerturatzea belaunaldi berriak; eta “Tailer biziak” dinamikaren bidez, eskualdeko sortzaileen jarduna jendarteratzea”.
Gonbidatu bereziak
Gonbidatu bereziak izan dituzte, gainera. Lehenbiziko tailerrean Leire Sanjurjo dantzaria izan zuten bidelagun (urriak 10), bigarrenean Txani Rodrigez idazlea (urriak 13), hirugarrenean (Maied Urrutia argazkilaria), laugarrenean Malen Atxa abeslaria (urriak 16), bosgarrenean Esti Urresola zinema zuzendaria (urriak 17) eta seigarrenean Yogurinha Borova draga (urriak 29).
Tailer biziekin beste 2 proiektu bidean
Eskualdeko gazteekin eginiko lanketa ez da izango “Tailer bizien” aldaera bakarra. Izan ere, bailarako emakume* sortzaileen ikus-entzunezkoak prestatzen dabiltza azken asteetan. “Azaroan aurkeztuko dugu egitasmoa, erakusketa batekin batera”, aurreratu dute. Modu horretan, duela bi urte osatutako datu base eta mapari bide eman nahi izan diote.