Tokiko memoria historikoa berreskuratu eta zabaltzea. Horiek izan dira “Aiaraldeko genealogia feminista” proiektuaren helburu nagusiak. 2022an heldu zion Bor-bor Aiaraldeko Feminismo elkarteak Mugimendu Feministaren ibilbidea jasotzeari. “Ordukoan historia dosierra ekoitzi genuen, podcast eta erakusketa bertsioarekin batera”, adierazi dute.
Aurtengo egitasmoan, poster eta ilustrazio formatua gehitu diote historia eguneraketari. Izan ere, euren hitzetan, 2022az geroztik gertaera eta ekimen ugari egon dira eskualdeko feminismoaren historia ezaugarritu dituztenak. Ilustrazio baten bidez ekintza horien pintzeladak islatzea eskatu zioten Raisa Alava zuhatzako artistari, eta berak sortu du artelana. Lamina hori poster bilakatu dute, horrela, atzealdean Aiaraldeko feminismoaren historia laburtuta.
Lan edo piezari “Aiaraldeko genealogia feminista” izenburua jarri diote, eta 50x70 zentimetroko posterrak inprimatu dituzte. Digitalki ere jarri dute komunitatearen eskura, labur.eus/borbor blogean deskargatzeko aukerarekin. Fisikoki ale bat eskuratu nahi duenak, berriz, Instagram kontura edo borborelkartea@gmail.com helbidera idatzi beharko du.
Aurkezpena, abenduaren 20an
Alabaina, zuzenean jasotzeko ere aukera egongo da. Izan ere, abenduaren 20an aurkeztuko dute publikoki proiektua, “Feminismoa Aiaraldean bor-bor” leloarekin gauzatuko duten topaketan. Laudion kokatutako Faktoria espazioa hautatu dute horretarako. Egitasmoa Arabako Foru Aldundiaren euskaraz sozializatzeko programen dirulaguntza deialdiari esker egin da.