Artziniegan hasi dituzte aurtengo 'Kulturartekotasun txangoak'

Maiatzaren 28an burutu zuten Kulturartekotasun txangoak ekimenaren lehen irteera. Oraingoan, Laudiotik abiatu zen autobusa,  Amurrioko San Jose geltokian eskualde osotik hurbildutako etorriberriak elkartu, eta Artziniega ezagutzeko helburuarekin.

Guztira, 55 lagunek parte hartu zuten udaberriko txangoan. Hala, 10:30etik 12:30era bidaia artistiko eta turistikoa uztartu zituzten, hein batean. Izan ere, Marratik at ezizenarekin ilustraziogintzan murgilduta dagoen Oihane MG izan zuten gidari, eta berak erakutsi zizkien Artziniegako kale eta bitxikeriak. 

Ostean, sormen eta arteari eman zioten bide, artistak dinamizatutako txapa eta iman tailerraren bidez, herriko frontoian. Modu horretan, goizean ikusi eta ikasitakoarekin, nahi zuten marrazkia egiteko erronka bota zien artziniegarrak, eta oroigarri eta oroitzapen ederra eraman zuten etxera. 

Kulturartekotasun txangoak egitasmoa iaz abiatu zuen Bor-bor elkarteak, kulturartekotasun eta feminismotik, Aiaraldeko emakume anitzen lana eta herriak ezagutarazteko.

Irteera antolatzeko Amurrio eta Laudioko EPA zentroekin elkarlanean jardun dute, Aiaraldea Komunikabideari adierazi diotenez. Aurten ere, iaz bezala, bi ibilaldi eskainiko dituzte; udazkenean izango delarik bigarrena. 

Argazkiak: Joane Lozano